Responsavel Konfisaun Relijioza sira halo audiensia ho Primeiru-Ministru, Taur Matan Ruak. Imajen: Media GPM

DILI (TATOLI)—Konfisaun relijioza, la inklui Igreja katóliku hasoru Primeiru Ministru, Taur Matan Ruak hodi husu atu haree no halo revizaun ba artigu balun iha kódigu sivíl Timor-Leste, tanba artigu refere ignora relijiaun balun.

Preokupasaun ne’e hato’o hosi Responsavel Konfisaun relijioza sira, ne’ebé kompostu husi reprezentante Igreja Protestante Timor-Leste (IPTL), Pastor Lorenço do Santos, reprezentante Igreja Evanjélika Asembleia de Deus (IEAD), Pastor Francisco dos Reis, reprezentante Konsellu Nasionál Izlámiku Timor-Leste (CONISTIL), H. Ahmad Ali Al-Ayyubi no reprezentante hosi Konfisaun Budha, iha Palásiu governu, horisehik.

“Ami hato’o preokupasaun ruma konaba lei kódigu sivíl ne’ebé ignora konfisaun relijioza seluk, laiha direitu sertidaun kazamentu no Ministériu Justisa (MJ) la rekoñese”, tenik reprezentante Igreja Evanjélika Asembleia de Deus (IEAD), Pastor Francisco dos Reis ba jornalista sira iha Palásiu Governu, Tersa ne’e.

Tuir nia, antes ukun an sertidaun ne’e rékoñesidu no antes tinan 2011 rekoñese hela, maibé bainhira  mosu lei kódigu sivíl husi Ministériu Justisa ignora relijiaun seluk.

“Ida ne’e mak komunidade hanesan Izlámiku, Protestante no relijiaun seluk afetadu no Primeiru-Ministru konsidera. Ami mós hato’o ba Primeiru-Ministru para halo revizaun tanba lei ne’e ladún di’ak tanba seidauk sosializa no atu aplika ba ladi’ak”, nia informa tan.

“Primeiru-Ministru dehan tenke trata buat ida ne’e tanba ne’e lapsu ida. Ami sente diskrimina tanba dokumentu atu trata iha li’ur ladi’ak”.

Entretantu tuir Lei Kódiku Sívil ne’ebé aprova Lei 10/2011, 14 Setembru, iha artigu 1475º konaba kazamentu sivíl, katóliku no barlakeadu monogâmiku, haktuir kazamentu hanesan sivíl, katóliku no barlakeadu monogâmiku.

Nune’e mós lei sivíl rekoñese valor no efikásia kazamentu ba matrimóniu katóliku no ba matrimóniu barlakeadu monogâmiku.

Aproveita biban ne’e, responsavel Konfisaun relijioza sira ne’e hato’o komprementus no felisitasaun ba Xefe Governu, Taur Matan Ruak.

Jornalista: Julia Chatarina

Editór : Manuel Pinto

HAKEREK NO HATÁN

Please enter your comment!
Please enter your name here