Prezidente Partidu CNRT, Kay Rala Xanana Gusmão.

DILI, (TATOLI) – Prezidente Partidu Kongresu Nasionál Rekonstrusaun Timor (CNRT-sigla portugés), Kay Rala Xanana Gusmão, dehan Parlamentu Nasionál (PN) kansela Prezidente Repúblika, Francisco Guterres Lú Olo, nia viajen ba Vatikanu hodi hasoru Santidade Papa Françisco, tanba Konstituisaun Repúblika Demokratika Timor-Leste mak permite.

“Ita hotu tenke hatene katak Prezidente Repúblika, Fransisco Guterres Lú Olo, mak uluk Prezidente asembleia konstituante, sira mak hakerek konstituisaun no sira kompriende liu konstituisaun, tanba ne’e parlamentu kansela nia viajen mós tanba konstituisaun”, Xanana Gusmão ba jornalista sira iha PN, ohin.

Kansela vizita ne’e hanorin hodi fó hanoin fila fali momentu juramentu kuandu asume kna’ar. “Eu juro cumprir e fazer cumprir a constituição. Signifika katak ha’u jura hodi kumpre no halo tuir konstituisaun”.

“Ida ne’e mak hanorin ita atu dehan kumpre konstituisaun maibé agora ita hotu kumpre konstituisaun ka kestiona”, afirma.

“Ha’u uluk prezidente mós ha’u sente katak ha’u labele book-án tanba parlamentu mós nia iha kbiit, nune’e mós governu. Ha’u labele tau ha’u nia kanoru tohar ba laran. Tanba ne’e mak ita hotu tenke buka kumpre konstituisaun”, realsa.

PN liuhosi sesaun plenária horiseik vota kontra viajen PR nian ba Vatikanu atu halo audiénsia ho Santidade Papa Françisco, hahú iha 17 to’o 27 novembru, nune’e rezultadu votasaun a favor 26 no kontra 35.

Lei inan Timor-Leste nian iha artigu 69 ko’alia kona-ba prinsípiu haketak podér sira; orgaun soberania sira, iha sira-nia relasaun ba-malu no bainhira hala’o knaar, tenke tuir prinsípiu separasaun no interdependénsia kbiit nian ne’ebé iha Lei-Inan nia laran.

Jornalista: Zezito Silva

Editora: Rita Almeida

HAKEREK NO HATÁN

Please enter your comment!
Please enter your name here