Xefe Kaza Sivíl Prezidénsia Repúblika, Francisco Maria de Vasconcelos

DILI, (TATOLI) – Prezidente Repúblika, Francisco Guterres Lú Olo, konsidera Estadu Vatikanu espesiál teb-tebes ba timoroan sira, tanba iha signifikadu rua maka nu’udar Sidade-Estadu no nu’udar Santa Sé, sede Igreja Katólika nian.

Nia hateten Sua Santidade Amu Papa Francisco maka Xefe Estadu no ukun Estadu Vatikanu ho kbi’it hotu-hotu nomós Sua Santidade Amu Papa Francisco maka atuál Xefe Supremu Igreja Katólika nian iha mundu.

“Ho onra no orgullu teb-tebes maka ha’ u simu informasaun katak Estadu-Vatikanu simu ha’u-nia pedidu atu hetan malu ho Sua Santidade Amu Papa Francisco. Enkontru ne’e atu realiza iha loron 23 Novembru, tuku 10:00”, Xefe Estadu Lú Olo hato’o liuhusi Xefe Kaza Sivíl Prezidénsia Repúblika, Francisco Maria de Vasconcelos, iha Palásiu Prezidente Nicolau Lobato, Bairru Pité, tersa ne’e, relasiona ho membru Parlamentu Nasionál kansela viajen Prezidente Repúblika ba Vatikanu iha 23 novembru, tinan ne’e.

Lú Olo dehan tanba Parlamentu Nasionál vota kontra vizita Estadu ne’e, Xefe Estadu Timor-Leste lakon oportunidade atu konvida pesoalmente Sua Santidade Amu Papa atu vizita Timor iha tinan 2019, tinan ida ne’ebé timoroan sei selebra aniversáriu data istórika importante rua: ida maka 12 outubru, aniversáriu ba dala 30, Sua Santidade Amu Papa João Paulo II vizita Timor-Leste no ida seluk maka 30 agostu, loron aniversáriu Referendu ba dala 20.

Nia haktutir vizita Papa nian iha tinan 1989 dada liu-tan atensaun internasionál ba povu Timor-Leste nia terus no hasa’e liu-tan apoiu ba luta libertasaun nasionál.

“Ha’u fó hanoin katak iha tempu rezisténsia, Igreja Katólika sai nu’udar komponente ida ba ita-nia rezisténsia kulturál. Ha’u fó hanoin mós katak manifestasaun públika ba dahuluk, iha 12 outubru 1989, hafoin misa papál, iha Tasitolu, maka loke dalan foun ida ne’ebé efetivu teb-tebes atu hato’o ita-nia luta ba komunidade internasional”, Prezidente Repúblika tenik.

Lú Olo esklarese karik vizita Estadu ne’e halo duni no Sua Santidade Amu Papa mai Timor-Leste, fiar katak vizita rua ne’e sei hasa’e liu-tan forsa espirituál maioria povu nian no hametin no haburas liu-tan relasaun Timor-Leste nian ho Santa Sé no Estadu Vatikanu.

“Ha’u fó hanoin mós katak iha 14 agostu 2015, Primeiru-Ministru Timor-Leste no reprezentante Vatikanu assina Konkordata, iha Dili. Tratadu internasional ne’e refere ba ámbitu espirituál nomós ba edukasaun, solidariedade no fó asisténsia ba vulnerável sira. Liuhosi akordu ne’e, Estadu Timor-Leste rekoñese ezisténsia no direitu Igreja Katólika no katóliku sira-nian iha Timor-Leste”, afirma.

Aleinde ne’e, nia hatutan Parlamentu Nasionál liuhosi rezolusaun númeru 18/2015 mós ratifika Konkordata ne’e iha 26 Outubru 2015 no Jornál Repúblika publika Rezolusaun ne’e iha 11 novembru 2015, ne’e duni orgaun soberania ida-idak tenke onra kompromisu ne’ebé Estadu Timor-Leste asume ho Konkordata ne’e.

“Prezidente Repúblika hakarak teb-tebes onra Estadu nia kompromisu boot ida ne’e. Tanba ne’e maka husu ba Parlamentu Nasionál atu fó autorizasaun ba Prezidente Repúblika atu bá Vatikanu, maibé Parlamentu Nasionál ho forsa deputadu 35 hosi partidu ne’ebé ukun ohin loron, fila kotuk ba vizita Estadu ne’ebé importante teb-tebes ba maioria katóliku namkari iha Timor-Leste tomak no  Estadu Timor-Leste tomak”, Xefe Estadu haklaken.

Prezidente Repúblika lamenta tebtebes ho desizaun maioria AMP nian iha Parlamentu Nasionál, hodi halakon oportunidade di’ak ida ne’e no tuir kompeténsia ne’ebé hatúr iha Konstituisaun RDTL, Prezidente Repúblika maka Xefe Estadu Timor-Leste no Xefe Estadu Timor-Leste maka reprezentante públiku aas liu Estadu Timor-Leste nian iha rai-laran no iha rai-liur.

“Relasaun internasionál ne’e importante teb-tebes atu ita buka-hetan, ho rai sira seluk nia tulun, oinsá lori dezenvolvimentu ba oin no hamenus kiak no mukit iha ita-nia rai doben”, subliña.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here