Embaixadór Portugal iha Timor-Leste, José Pedro Machado Viera. Imajen António Goncalves

DILI, (TATOLI) – Embaixadór Portugal iha Timor-Leste, José Pedro Machado Viera, hateten trata asuntu nasionalidade ba sira hanesan kestaun sériu, mesmu sira nia parte la konkorda atrazu iha prosesu ne’e.

“Trata nasionalidade ba ami hanesan asuntu ne’ebé mak sériu, em jerál ami la konkorda iha atrazu atu trata asuntu nasionalidade”, tenik ba jornalista sira iha Palásiu Governu, ohin.

Embaixadór ko’alia kestaun ne’e hafoin hasoru Primeiru-Ministru, Taur Matan Ruak, hodi hatan ba proukupasaun joven sira ne’ebé husu Embaixada Portugal bele prosesa lalais dokumentu.

“Ami tenta halo audiénsia ho reprezentante husi manifestasaun sira, nune’e mós ami agredese ba Estadu Timor-Leste, tanba esforsu ne’ebé halo hodi fó ona seguransa ba instalasaun misaun diplomátika ne’ebé tenke hetan protesaun”, katak.

Biban ne’e diplomata ne’e mós haktuir intensaun nia parte halo audiénsia ho Primeiru-Ministru hodi hametin relasaun entre Portugal no Timor-Leste.

“Ohin halo audiénsia ho Xefe Governu hodi ko’alia kona-ba relasaun kulturál entre Portugal no Timor-Leste, no ami nia vontade ne’ebé kontinua nafatin relasaun entre nasaun rua ne’e, liu-liu kooperasaun bilaterál”, dehan.

Nia afirma lia-portugés hanesan aspeitu transversál ba relasaun hotu, nune’e Primeiru-Ministru hato’o mós interese atu hametin relasaun nasaun rua ne’e no konkretiza relasaun amizade, istória no kulturál.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here