Distribuisaun osan hodi komemora 12 novembru nomós loron nasionál juventude. Foto TATOLI: Egas Cristovão.

DÍLI, (TATOLI)-Alumni Parlamentu Foinsa’e Timor-Leste (APFTL) distribui osan ho valór rihun 72 ba komisaun munisipál sira husi munisípiu hodi komemora Masakre 12 Novembru ba da-27 nomós selebra Loron Nasionál Juventude ba da-13, ne’ebé sei realiza iha teritóriu nasionál entre loron 11 no 12 novembru 2018.

Osan ne’e aloka ba parte tolu hanesan montante dolár 39,890,00 ba munisípiu sira.Osan kada munisípiu mak Aileu ho valór dolár 3,760,00, Ainaro ho valór 3,220,00, Baucau ho valór 4,110,00, Bobonaro ho valór 4,210,00, Covalima ho valór 4,625,00 no Ermera ho valór 3,595,00.

Ba munisípiu Liquiça ho valór 2,245,00, Lautem ho valór 3,675,00, Manatuto ho valór 4,310,00, Manufahi ho valór 3,120,00 no Rejiaun Autonóma Espesiál Oe-cusse Ambeno (RAEOA) ho valór 3,120,00 hodi realiza atividade hanesan semináriu, jogu amizade, reflesaun no kari aifunan no konsertu kalan iha kada munisípiu.

Tuir mai, ba Eskuteiru Katóliku-Agrupamentu CORIMA, Balide-Díli, ho montante dolár 2,500,00 no Komisaun Organizadora Nasionál ho montante dolár 29,610,00 hodi realiza mós atividade idéntika ne’ebé definida ona tuir planu no ajenda husi komisaun sira.

Prezidente APFTL, Zaulino Gomes da Silva informa katak distribuisaun ne’e realiza hodi komemora eventu importante rua ne’e, tanba parseria ho Sekretáriu Estadu, Juventude no Desportu (SEJD), liuhusi Diresaun Nasionál Juventude (DNJ), nune’e nia husu ba komisaun munisipál sira atu ezekuta ho responsabilidade no rigór tanba osan ne’e estadu nian no komún.

“Ita iha responsabilidade gasta ho loloos, tuir planu no programa hodi garante iha implementasaun. Nune’e mós, hodi kontribui ba boa governasaun iha estadu ida ne’e,” dehan prezidente APFTL, Zaulino Gomes da Silva, perante komisaun sira, iha Uma Biti-Boot, SEJD, Lecidere-Díli, ohin, molok halo distribuisaun osan ne’e.

Iha fatin hanesan, Diretór Nasionál Juventude, David Tomas de Deus ba komisaun sira katak uza osan rihun 72 ho loloos no efikasia, hodi dignifika no valoriza mós eroi no martir pátria sira.

“Husu ita-nia kolaborasaun, iha ita-nia atividade tomak, atu dignifika nafatin sira, nune’e ita-nia jerasaun foun sira tuir mai banati tuir. Prátika ho loloos no tuir planu atu bele iha efikasia,” hateten Diretór Tomas de Deus.

Nia reforsa, komemorasaun Masakre 12 Novembru no Loron Nasionál Juventude, hodi hanoin hikas joven sira ne’ebé hatudu ona sira-nia nasionalizmu no patriotizmu hodi luta ba indepedénsia Timor-Leste nian.

“Ho sira-nia espiritu nasionalizmu no patriotizmu, transmite mai ita, hodi kontribui ba iha prosesu dezenvolvimentu nasionál. Dignifika eroi sira,” akresenta diretór nasionál juventude, SEJD, ne’e.

Entretantu, iha distribuisaun ne’e, APFTL no SEJD mós halo “briefing” no legaliza komisaun munisipál no rejionál, introdusaun ba: realizasaun/dinámika atividade iha munisípiu sira, informa komisaun sira kona-ba relatóriu narativa no finanseira no ko’alia kona-ba distribuisaun materiál (kamizola banner no seluk tan-loloos distribui ohin maibé kestaun tékniku la konsege distribui).

Tema ba komemorasaun loron juventude nasionál iha tinan ida ne’e mak Husi Juventude ba Juventude hodi Prepara Juventude ba Futuru. Enkuantu 12 Novembru nian, Komité 12 Novembru mak sei define.

Hafoin komemorasaun eventu nasionál rua ne’e, tuir planu APFTL-loron haat, komisaun husi munisípiu idaidak iha obrigasaun submete relatóriu no aneksa mós resibu inklui mós dokumentu esensiál balun relasiona ho atividade relevante iha komisaun nasionál hodi garante transparánsia no akuntabilidade.

Jornalista: Rafy Belo

Editór : Manuel Pinto

HAKEREK NO HATÁN

Please enter your comment!
Please enter your name here