Provedora Jesuina Maria Ferreira Gomes. Imajen/Portal Ofisiál PDHJ

DILI, (TATOLI) – Parlamentu Nasionál (PN) liuhosi sesaun plenária segunda ne’e hili ona Jesuina Maria Ferreira Gomes hanesan Provedora Direitu Umanu no Justisa (PDHJ-sigla portugés) ba mandatu tinan haat.

Jesuina Maria eleitu iha segunda ronda ho votu 38, konkore ho Horácio de Almeida ho votu 23, husi deputadu 61 ne’ebé prezente.

Tuir lei númeru 7/2004 5 maiu kona-ba estatutu PDHJ, artigu 12o hateten PN dezigna PDHJ ho maioria absoluta votu deputadu iha efetividade funsaun, nune’e presiza votu mínimu 33.

“Ho ida ne’e parlamentu hili señora Jesuina Maria Ferreira Gomes hanesan Provedora direitus umanus no justisa”, deklara Prezidente Parlamentu Nasionál (PPN), Arão Noe, iha plenária ohin.

Antes ne’e iha eleisaun primeira ronda, Aniceto Guro Bertani Neves hetan votu 0, Filipe Rodrigues Pereira 2, Florindo José Cristovão 0, Henrique de Oliveira Ximenes 0, Horácio de Almeida 20, Isabel da Costa Ferreira 3, Jaime Xavier 0, Jesuína Maria Ferreira Gomes 31, José Luis Oliveira 1, José Pereira da Conceição 0, Nivio Leite Magalhães 3, Silveiro Pinto Baptista 0 no votu em branku 1, ho totál votu 61.

PPN agradesse ba kandidatu sira ne’ebé submete ona naran. “Ida ne’e mak prosesu demokrátiku, tuir desizaun plenária, desizaun mak ida ne’e no ha’u husu ita boot sira nia kontribuisaun nafatin ba dezenvolvimentu Provedór Direitus Humanus no Justisa iha Timor-Leste”, afirma.

Nia hatutan tan: “Ha’u hatene ita boot sira prenxe kritériu maibé desizaun iha plenária, tanba ne’e ha’u husu ita boot sira nia kontribuisaun nafatin ba funsionamentu orgaun ida ne’e”.

Entretantu provedora eleitu ne’e subsitui Silveiro Pinto Baptista, ne’ebé termina ona mandatu iha loron 30 outubru. Provedora ne’e sei simu pose iha tempu badak.

Jesuina Maria hasai Mestradu iha Administrasaun Públika iha Universidade Hawaii Manoa, Estadu Unidu Amérika (EUA) tinan 2002 to’o 2004.

Iha kareira servisu, iha loron 14 janeiru 2015 hetan nomeasaun husi Prezidente Parlamentu Nasional hanesan Provedora Adjunta ba área Boa-Governasaun.

Iha tinan 2012 nomeiada hanesan Komisária singulár ba asuntu sira ne’ebé ho formasaun ba funsionáiru públiku RDTL nian nomós nu’udar formadora iha INAP.

Iha tinan 2000, hanorin Jestaun Públika iha universidade públika (UNTL) hafoin kontinua estudu iha USA. Bainhira fila mai Timor, serbisu iha instituisaun oin-oin (Peace Corps, USAid, Ausaid) no kontinua hanorin iha UNTL iha fakuldade siénsia sosiál no polítika.

Iha fulan jullu 2009 nu’udar Inspetora-Jerál iha Ministériu Administrasaun Estatal no Ordenamentu Teritóriu.

Iha loron 13 outubru tinan hanesan, PN hili nu’udar komisária ba Komisaun Funsaun Públika.

Entre tinan 1995 no 1997, ezerse kna’ar hanesan sekretária no Xefe ezersísiu iha administrasaun postu administrativu Atabae, munisípiu Bobonaru.

Iha tinan 1994 nu’udar asistente administrativa iha Governu Provinsiál Timor-Leste nian.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here