Timor Resources Sei Konstrui Tanke Bee Moos Ba Komunidade Labarai

0
90
Komunidade Covalima ho hatais tradisionál. Foto TATOLI: Rafy Belo

DILI, (TATOLI) – Kompañia Austrália ho naran Timor Resources sei konstrui tanke bee moos no apoiu jerigen mamuk hamutuk 1000 ba komunidade postu administrativu Suai Vila, munisípiu Kovalima, oinsá bele asesu bee moos.

“Ami promete atu ajuda ema husi Labarai ho konstrui atu fó bee moos, fó ho pipa (kadoras) atu fornese bee ne’ebé komunidade ne’e susar tebes atu hetan”, dehan diretora kompañia, Suellen Osborne, perante komunidade sira iha Suai Vila, ohin.

Nia hateten haree ho laran susar no konsidera, liliu avó sira kaer jerigen mamuk no ku’ak hodi hetan no kuru bee ba nesesidade bázika.

“Ne’ebé, ho ida ne’e ami halo inisiativa, sei hato’o iha ne’e jerigen litru haat nian ne’e rihun ida atu bele fó ba avó sira, tia sira atu bele troka tiha jerigen ne’ebé sira iha tanba ami haree katak balun la moos”, kompromete diretora ne’e.

Relasiona ho komprimísiu ne’e, administradór munisípiu Kovalima, Afonso Nogueira Nahak, ba ajénsia TATOLI, ohin, iha Suai Vila agradese.

“Kompañia Timor Resources hakarak ajuda dada bee iha Labarai nomós iha parte Matai no seluk. Iha ami Suai, úniku solusaun mak tenke lori bee husi Datotoluk ba mai. Se la to’o karik, hetan bee mai husi Ainaro ou Manufahi”, dehan autoridade ne’e.

Afonso Nogueira Nhak katak to’o agora kuaze aldeia 40 resin mak seidauk asesu eletrisidade.

Tanba ne’e, Afonso Nahak hato’o ona situasaun ne’e ba Ministériu Obras Públikas, liliu ba iha Divizaun Jerál Eletrisidade, sente katak iha oitavu governu molok remata komunidade sira bele asesu ona naroman.

Nia husu ba eis-veteranu sira ne’ebé agora hanesan emprezáriu atu labele hadau malu projetu, maibé kolabora hamutuk atu lori naroman ba povu.

Antes ne’e iha salaun administrasaun munisípiu Kovalima, Adminitradór relata katak jeralmente komunidade Kovalima iha ona eletrisidade. “Tuir ami-nia dadus ita bele dehan oitenta porsentu komunidade Kovalima asesu ona eletrisidade”.

Jornalista: Rafy Belo

Editora: Rita Almeida

HUSIK IDA HATÁN