SEKOMS-SENEK Entrega Sertifikadu Lian-Portugés Ba Profesionál Komunikasaun Sira

0
68
Sekretária Estadu Negósiu Estranjeiru no Kooperasaun (SENEK) Portugal, Teresa Ribeiro, hatudu hela sertifikadu ba jornalista Tatoli, Julia Chatarina, iha Palásiu Governu, ohin. Imajen António Goncalves

DILI, (TATOLI) – Sekretáriu Estadu Komunikasaun Sosiál (SEKOMS), Merício Juvenal dos Reis Akara, no Sekretária Estadu Negósiu Estranjeiru no Kooperasaun (SENEK) Portugal, Teresa Ribeiro, ohin entrega sertifikadu ba professionál meiu komunikasaun sosiál husi nivel báziku no intermédiu sira hamutuk formandu 102.

Kursu lian-portugés ne’e bazea ba kooperasaun governu Timor-Leste no Portugal liuhosi SEKOMS no Camões – Instituto da Cooperação e da Língua, I.P, ne’ebé oferese programa ne’e.

Programa realiza liuhosi protokolu kooperasaun iha Projeitu Konsultória Lian ba Jornalista sira ne’ebé ho durasaun tinan tolu, hahú 2016 to’o 2019.

SENEK Portugal, Teresa Ribeiro, felisita formandu sira no agradese ba formadór sira, tanba kria kondisaun hodi bele to’o etapa ne’e.

“Ohin entraga sertifikadu ba imi nia profisiensia no domíniu iha lian-portugés. Saida mak ha’u rona ohin husi reprezentante, ha’u bele promete atu transmite ba governu Portugal, atu ami iha disponibilidade atu kontinua projetu ne’e”, tenik iha ninia diskursu.

Tuir nia projetu ne’e fó rezultadu no pessoalmente nota diferensa boot iha emprensa eskrita iha Timor-Leste tinan rua liubá no ohin loron.

Formandu sira hasai retratu hamutuk hafoin simu sertifikadu. Imajen António Goncalves

“Ida ne’e tanba imi nia vontande, empeñu, esforsu no dedikasan atu aprende lian-portugés. Ha’u hakarak subliña kona-ba importánsia husi imi nia profisaun, papel jornalista esensiál atu sidadaun bele hetan informasaun ho rigor, no bele iha preferénsia. Ida ne’e esensiál atu iha sosiedade ne’ebé livre no justu”, katak.

hodi hatutan: “Parabéns ba imi hotu, no obrigada ba imi hotu nia esforsu, no ha’u nia promesa mak governu portugés kontinua empeña no intende governu Timor-Leste no kontinua mantein ligadu realizasaun aprendizajen no kultura husi projetu ne’e”.

Biban hanesan, Merício Juvenal dos Reis Akara iha ninia diskursu hateten orgullu bele entrega sertifikadu ba formandu sira ne’ebé halo esforsu ona atu aprende lian-portugés no ohin loron bele hetan sertifikadu.

Nune’e mós governante ne’e agradese ba kooperasaun iha ámbitu aprendizajen lian-portugés ne’ebé hametin tan relasaun.

“Ha’u ko’alia ona ho Sekretária Estadu Negósiu Estranjeiru no Kooperasaun Portugal, katak ida ne’e sinál pozitivu no sei koko mantein no kontinua, la’os iha Dili de’it maibé iha teritóriu tomak”, tenik.

Tuir nia lian portugés hanesan lian ofisiál ida, ne’ebé ita tenke dezenvolve iha tempu hanesan mós labele haluha dezenvolve mós lian-tetu.

“Ha’u husu bainhira imi ko’alia maka’as ona lian-portugés, labele haluha mós lian-tetun no dezenvolve, ko’alia no hakerek di’ak liu, tanba públiku preokupa bainhira jornalista sira hakerek dala ruma uza termu ne’ebé la loos”, enkoraja.

Iha seremónia ne’e, partisipa mós Adjuntu Sekretaria Estadu Negósiu Estranjeiru no Kooperasaun (SENEK) Portugal, João de Albuquerque, Vise-Prezidente Institutu Camões, Gonçalo Teles Gomes, Embaixadór Portugal iha Timor-Leste, José Pedro Machado Vieira, Adida Kooperasaun, Cristina Faustino, Enkarregada Sesaun Konsulár, Joana Sousa Fialho Pinheiro no Diretór Nasionál sira.

Jornalista: Julia Chatarina

Editora: Rita Almeida

HUSIK IDA HATÁN