DILI, (TATOLI) – Prezidente Repúblika, Francisco Guterres Lú Olo, orgullu ba prestasaun paratleta na’in rua ne’ebé foin lalais hetan medalla osan mean rua no medalla osan mutin (bronze) ida iha kompetisaun internasionál boot ida, Asian Paragames terseira edisaun iha Jakarta, outubru 2018.
Eventu ne’e, paratleta, Teófilo Freitas, hetan osan mean no Pascoela Pereira dos Santos hetan osan mutin.
“Ho orgullu no haksolok hosi povu Timor-Leste tomak mak ha’u simu ohin iha Palásiu Prezidensiál Nicolau Lobato, paratleta rua, ne’ebé hatudu sira-nia talentu desportivu, la’ós de’it iha ita-nia rai doben maibé iha mós kompetisaun internasionál”, Xefe Estadu dehan liuhusi ninia diskursu bainhira simu paratleta sira iha Palásiu Prezidente Nicolau Lobato, Bairru Pité, segunda ne’e.
Tuir nia medalla ne’ebé de’it iha ninia valór espesiál, tanba reprezenta esforsu hosi atleta rasik, treinadór no hosi dalan oioin hodi kontribui ba susesu.
“Bainhira ita-nia atleta hetan medalla osan mean iha kompetisaun internasionál ruma, ita hotu-hotu kontente liu-tan, tanba estádiu tomak hamriik nonók hodi fó onra ba ita-nia rai ki’ik no ki’ak ne’e, liuhosi serimónia hasa’e bandeira no toka hinu RDTL”, katak.
Xefe Estadu haktuir Teófilo simu ona medalla osan mean haat, medalla rua bainhira partisipa Sea Paragames iha Malázia no tinan ne’e iha Asian Paragames ho modalidade atletizmu ba metru 400 no metru 1,500 m, Teófilo oferese medalla osan-mean ba dahuluk hosi Asian Paragames ba Timor-Leste.
Iha modalidade metru 400, Teófilo la’ós manán de’it medalla osan mean iha segundu 53 no sentézimu sanulu resin haat, maibé nia hetan mós rekorde aziátiku foun, iha Azia tomak.
“Tanba Teófilo ninia talentu desportivu espesiál ne’e, Bandeira RDTL sa’e mastru dala haat ona iha rai liur no hinu RDTL toka dala haat ona iha kompetisaun internasionál boot dala rua. Timor-Leste nia naran morin liu-tán iha komunidade internasionál no tanba ne’e bele dehan katakTeófilo sai ona embaixadór boot ida ba rai doben ida ne’e”.
Aleinde ne’e, Prezidente Repúblika hatutan Pascoela oferese ba TL medalla dahuluk hosi modalidade Ténis Meza ka ping-pong hosi Asian Paragames no konsidera medalla ne’e iha mós méritu boot, tanba reprezenta talentu espesiál ida, hosi paratleta feto ida no susesu ne’e bele enkoraja mós feto maluk sira seluk atu haforsa-án.
Nu’udar feto barani no determinadu, atu moris ho kbi’it no hakarak rasik no hetan fiar hosi ema hotu-hotu.
Prezidente Repúblika fó mós parabéns ba profesór-sira, treinadór-sira no Komité Paraolímpiku no Komisaun Organizadora, ba hotu-hotu ne’ebé kontribui liuhosi dalan oin-oin ba susesu paratleta nain rua nian.
Nu’udar Xefe Estadu, nia husik hela rekomendasaun ida atu Governu haree oinsá haburas liu-tan modalidade desportu hotu-hotu, hahú hosi kedas labarik sira ho otas ki’ik.
“Ita tenke haburas liu-tan desportu eskolár. Ita presiza habelar hanoin katak eskola ida la kompletu bainhira laiha atividade desportiva. Desportu haforsa ita-nia ki’ikoan sira-nia saúde, iha aspetu hotu-hotu no nune’e ita sei iha populasaun saudável liu”, Lú Olo esklarese.
Atu desportu bele buras ba beibeik, nia tenik presiza harii infraestrutura loloos no forma tan profesór no treinadór ba modalidade hotu-hotu.
Eventu internasionál ne’e envolve rai 43 no atleta besik 3000 hosi modalidade 18, enkuantu, TL partisipa iha modalidade neen.
Jornalista: Xisto Freitas
Editora: Rita Almeida