PR Husu PNTL Asegura Seguransa iha Finadu

0
63
Komandante Jerál PNTL, Komisáriu Júlio da Costa Hornai dadalia ho jornalista sira hafoin ramata inkontru ho Xefi Estadu Lú-Olo. Imajen Ajénsia TATOLI/Xisto Freitas

DILI, (TATOLI)—Prezidente Repúblika (PR) Francisco Guterres Lú Olu husu ba Polisia Nasionál Timor-Leste (PNTL), asegura seguransa iha selebrasaun loron feriadu ba matebian (finandu-red).

Pedidu, PR Lú Olo hato’o durante hasoru malu ho Komandante Jerál PNTL, Komisariu Julio Hornay, ohin iha Palásiu Prezidensiál Bairru-Pité Dili.

“Presidente husu ba ami atu hato’o ba komandu hotu-hotu para halo preparasaun seguransa di’ak iha loron finadu,” Julio Hornay informa hafoin hasoru malu ho Prezidente Repúblika.

Relasiona ho ida ne’e, Komandante PNTL ne’e adianta, Komandu iha ona planu operasaun hodi halo pasa revista ba viaturas privadu no públiku ne’ebé sei hala’o viajen hosi Kapitál ba Munisípiu hodi selebra loron importante ne’e.

“Polisia iha ona planu operasaun, ami sei fó orientasaun ba munisípiu hotu.”

Objetivu hosi pasa revista ne’e, atu evita asidente tráfiku. Maibé atu alkansa ida ne’e, komisáriu ne’e husu atu reseita lei sinais tránzitu. Ezemplu ida mak; evita tuur iha karreta leten (kapong), labele konsumu alcohol no seluk tan.

Entretantu, husu mós jovens sira atu evita hosi konflitu hodi rezulta krime durante selebrasaun misa iha loron finadu (2 Novembru 2018) no kari ai funan iha semitériu tenke mantein estabilidade.

Jornalista:Agapito dos Santos

Editór : Manuel Pinto

HUSIK IDA HATÁN