PJR Aprejenta Kandidatu Nain Tolu Ba PR

0
41
Prokuradór Jéral Repúblika (PJR), José da Costa Ximenes.

DILI, (TATOLI) – Prokuradór Jéral Repúblika (PJR), José da Costa Ximenes, hateten nia parte haruka ona lista  naran hosi kandidatu nain tolu hodi  subtitui kargu adjunta PJR foun.

ʺAmi haruka ona kandidatu nain tolu ba Prezidente Repúblika hodi hein desizaunʺ, dehan PJR hafoin enkontru semanál ho Xefe Estadu, Francisco Guterres Lú Olo, iha Palásiu Prezidensiál, Bairru Pité, ohin.

Bainhira husu naran kandidatu sira, PJR lakohi mensiona. “Laiha étika kuandu ha’u temi naran maibé konsellu majistradu haruka ona ba Prezidenteʺ, tenik nia.

Mandatu Adjunta PJR, Zelia Trindade, termina ona iha loron 28 setembru foin lalais ne’e. Adjunta agradese ba Prezidente Repúblika, Prokuradór Jerál, Majistradu Ministériu Públiku, funsionáriu PJR inklui família, tanba apoiu ona ninia servisu durante períodu rua, dahuluk iha 13 setembru 2012 to’o 2015, kontinua tan hosi 28 setembru 2015 to’o 28 setembru 2018.

“Hanesan timoroan ha’u onra no louva, tanba fó ona kontribuisaun ba ha’u nia nasaun, jeralmente iha setór justisa no partikularmente iha ministériu Públikuʺ, hateten adjunta ne’e hafoin agradese Xefe Estadu iha Palasiu Prezidensiál, ohin.

Zelia Trindade promete sei fó apoiu ba adjuntu foun ne’ebé sei asume mandatu durante tinan hirak mai hodi fó susesu ba setór justisa.

Jornalista: Agapito dos Santos

Editora: Rita Almeida

HUSIK IDA HATÁN