Parseiru Importante CCI-TL Mak Governu Timor-Leste

0
42
Prezidente Kámara Komérsiu Indústria Timor-Leste (CCI-TL), Oscar Lima, ho nia estrutura dadalia ho jornalista sira iha Palásiu Prezidene Nicolau Lobato, Bairru Pité, foin lalais. Imajen Mídia Palásiu PR.

DILI, (TATOLI)—Prezidente Kámara Komérsiu Indústria Timor-Leste (CCI-TL sigla iha portugés), Oscar Lima, iha kongresu nasionál CCI-TL nian ba datoluk ho tema “Reforsa Setór Privadu Kreativu Liu, Produtivu no Sustentável” agradese ba Governu tanba hetan apoiu no aumenta ho orientasaun barak tanba parseiru importante ida boot tebes mak Governu Timor-Leste.

“Ami lá haluha mós agradesimentu boot tebes ba maun Kay Rala Xanana Gusmão ne’ebé maka inisia atu forma Kámara Komérsiu Indústria Timor-Leste ita tempu ne’ebá no apoiu ne’ebé fó iha momentu ne’ebá maizumenus pur volta $200 mil”, Oscar afirma iha ámbitu kongresu nasionál ne’ebé halo atu hili prezidente no estrutura foun CCI-TL nia ba períodu 2018-2022 iha Novu Turizmu, ohin.

Aleinde ne’e agradese ba antigu membru Governu no atuál Governu para solusiona problema ne’ebé maka iha sobre edifísiu CCI-TL (eis embaixada Portugál nian) nian iha Akait no daudaun sai ona fatin permanente ba sira iha Dili ne’e.

“Ohin loron importante ba vida emprezáriu Timor-Leste espesiál ba CCI-TL organiza nia kongresu ida ne’e ba dala-tolu. Kongresu ida ne’e realiza ho sirkunstánsia oioin no dezafiu oioin tanba ita-nia situasaun atuál enjerál buat ida ne’ebé ita hotu hatene, emprezáriu sira ne’ebé komesa husi boot to’o ki’ik sente iha ne’e nia laran”.

Hatutan durante nia mandatu buat barak mak lá konsege halo, maibé hotu-hotu iha atu kontribui ba malu atu dudu oinsá maka loron ida bá oin CCI-TL bele sai boot liután.

“Ita hotu-hotu hanoin Kámara Komérsiu ita-nia, ita hakarak ema atu rekoñese internasionálmente tanba ita halo buat barak, ita iha ligasaun ona, akordu iha li’ur ona”.

Nia relata mós CCI-TL iha kooperasaun di’ak ho banku sira (BNU, ANZ, BNCTL, MANDIRI no BRI) no tenta oinsá mak bele loke odamatan hodi fó fali kréditu ba emprezáriu sira.

“No sira ajuda fó treinamentu ba ami-nia emprezáriu sira munisípiu hotu dezde 2014 to’o agora. Emprezáriu sira ne’ebé halo formasaun 5.457 mak hetan ona treinamentu hamutuk ho IADE no banku sira no Banku Sentrál Timor-Leste ne’ebé fó apoiu boot tebes halo treinamentu ba emprezáriu sira oinsá maka bele jere sira-nia osan”, nia hatete saida maka halo durate nia mandatu ne’e.

Prezidente Komisaun Organizadora kongresu datoluk nian, Hergui Lina Fernandes Alves, hatete oras ida ne’e nu’udar períodu konduzivu atu stakeholder (parte interesada sira) ekonómiku hotu-hotu bele reflete ba situasaun atuál iha períodu krize atu haree dalan, muda, dezenvolve estrutura nó mós haree ba ben estar atu esplora oportunidade negósiu hodi hasa’e produtividade hodi dezenvolve plataforma ekonómika foun atu rezulta setór privadu ida ne’ebé forte, independente no sustentável.

Hafoin halo reflesaun ba situasaun atuál setór privadu nasionál nó mós ba instituisaun Kámara Komérsiu Indústria Timor-Leste rasik, komisaun deside tema ba kongresu nasionál maka reforsa setór privadu kreativu liu, produtivu no sustentavel.

“Tema ida ne’e atu fanu ita hodi ka’er no haforsa ita-nia an hodi ka’er metin ekonomia nasaun. Ami fiar katak husi Kámara Komérsiu Indústria Timor-Leste sei promove rede negósiu, kooperasaun ho kadeia valór ba nia membru ho parseiru negósiu nasionál nó mós internasionál atu fortifika dezenvolvimentu nasaun nian”.

Asembleia jerál CCI-TL ne’e partisipa husi delegadu 252 ne’ebé maka husi ne’e porsentu 20 feto no 75 mak mane no eventu ne’e realiza ho osan montante rihun $44.600.

Kongresu ne’e loke husi Prezidente Repúblika, Francisco Guterres Lú Olo, no partisipa husi setór privadu timoroan sira husi munisípiu 12 inklui rejiaun espesiál Oekusi no sei halo durante loron rua husi 11-12 outubru ne’e.

Jornalista : Maria Auxiliadora

Editór : Manuel Pinto

HUSIK IDA HATÁN