Papél Setór Privadu Importante Ba Dezenvolvimentu Ekonómiku

0
45
Prezidente Kámara Komérsiu Indústria Timor-Leste (CCI-TL sigla portugés), Oscar Lima, dada-lia ho Prezidente Repúblika, Francisco Guterres Lú Olo, iha ámbitu kongresu CCI-TL iha Novu Turizmu, ohin. Imajen António Goncalves

DILI, (TATOLI) – Prezidente Repúblika, Francisco Guterres Lú Olo, hateten papél setór privadu importante tebes ba dezenvolvimentu ekonómiku tanba ekonomia nasaun nian labele dinamiza bainhira Estadu mesak maka kaer kompeténsia tomak.

“Ha’u sei halo artikulasaun ho Governu hodi haree oinsá bele kontribui ba esforsu ne’ebé presiza halo hodi fó meius ba rekursu setór privadu”, Xefe Estadu dehan liuhusi ninia diskursu bainhira loke kongresu Kámara Komérsiu Indústria Timor-Leste (CCITL-sigla portugés) ba dala tolu ne’ebé hala’o iha Novu Turizmu, Lesidere, kinta ne’e.

Nia afirma setór privadu nasionál sei fraku teb-tebes, tanba ne’e tenke halo esforsu atu kapasita setór refere.

“Ita tenke aproveita ita nia patrimóniu istóriku no kulturál ne’ebé folin boot hodi investe iha área turizmu. Turizmu hanesan setór ida ne’ebé maka iha potensiál boot teb-tebes, naran katak ita hatene halo investimentu sira ne’ebé presiza, liu-liu iha área rekursu umanu. Se ita la prepara ita nia ema, oinsá maka ita tau ema hodi halo aproveitamentu ba potensialidade sira”, katak Lú Olo.

Tuir Xefe Estadu ekonomia rai-laran depende maka’as liu ba reseita ne’ebé mai hosi minarai (minarai sai fali vísiu ida) no nasaun nia petensiál sira la hetan istima, la dezenvolve ka la aproveita.

Jornalista: Xisto Freitas

Editora: Rita Almeida

HUSIK IDA HATÁN