Oscar Lima Lamenta Krítika Ne’ebé Fó Ba Setór Privadu

0
86
Prezidente Kámara Komérsiu Indústria Timor-Leste (CCI-TL sigla portugés), Oscar Lima, simu Prezidente Repúblika, Francisco Guterres Lú Olo, hodi partisipa kongresu CCI-TL iha Novu Turizmu, ohin. Imajen António Goncalves

DILI, (TATOLI) – Prezidente Kámara Komérsiu Indústria Timor-Leste (CCI-TL sigla portugés), Oscar Lima, lamenta ho krítika ne’ebé dehan setór privadu nasionál depende de’it ba projetu Governu nian.

“Ami iha krítika barak husi membru Governu dehan setór privadu nasionál sei depende de’it ba projetu Governu nian. Setór privadu nasionál lubun ida mak ladepende ba projetu no lahalo serbisu ba Governu Timor-Leste nian, sé mak atu halo?”, Oscar haktenik iha kongresu nasionál ba datoluk ne’ebé hetan mós prezensa husi Prezidente Repúblika, Francisco Guterres Lú Olo, iha Novu Turizmu ohin, hodi loke atividade ne’e.

Nia hatutan bainhira setór privadu sira hetan benefísiu husi setór públiku, maibé lainveste ne’e maka dehan sala.

“Iha ne’e ita-nia maluk barak hatudu daudaun ona mai ita, maibé krítika mai nafatin ba setór privadu ne’e mak sala hela de’it. Ha’u hakarak hatete ida ne’e la’ós tanba ita haree ona ninia rezultadu, komesa iha daudaun maski ki’ik, boot mós iha ona”.

Nia salienta setór privadu sira ida-idak halo ona nia investimentu iha área barak no ema laharee. Tanba ne’e husu atu setór privadu hotu buka oinsá maka fó liman ba malu atubele hanorin malu atu sai emprezáriu ida loloos.

“Emprezáriu timoroan ne’e ko’alia loloos barak forte ona, ami komesa uluk ho ki’ik tebetebes ema ladún haree hetan, ikus ne’e barak tebes atu sa’e ona, maibé sei iha krítika nafatin katak emprezáriu timoroan sira ne’e seidauk bele (tidak mampu-hatete iha lia-indonézia), ne’e ha’u husu ba hasai tiha ida ne’e iha públiku nia laran”.

Jornalista: Maria Auxiliadora

Editora: Rita Almeida

HUSIK IDA HATÁN