Ofisiál Timor-Leste no Austrália Enkontru Dahuluk Haforsa Relasaun Bilaterál  

0
134
Ofisiál Timor-Leste no Austrália hasai foto hamutuk. Foto: MNEK

DILI, (TATOLI)-Ofisiál seniór Timor-Leste no Austrália halo enkontru dahuluk hodi reforsa liután relasaun bilaterál entre país rua, iha enkontru ne’e Ministériu Negósiu Estranjeiru no Kooperasaun (MNEK) Timor-Leste mak sai uma na’in.

“Ne’e refleta forsa maka’as iha relasaun entre nasaun rua dezde asina akordu fronteira marítima iha fulan marsu tinan ne’e,” refere komunikadu MNEK, Ajénsia TATOLI, asesu, ohin.

Ofisiál sira, tuir komunikadu ne’e, iha enkontru ne’e diskute kona-ba relasaun kooperativa luan no kle’an entre Timor-Leste no Austrália ne’ebé dura iha tempu naruk, kona-ba sira-nia interese ne’ebé hanesan iha rejiaun no oinsa nasaun rua ne’e bele kolabora ho di’ak liután atu promove sira-nia commitment komún ba orden internasionál ne’ebé bazea ba regulamentu sira.

Ofisiál sira mós diskute oinsa atu habelar kooperasaun seguransa bilaterál iha rejiaun ne’e no diresaun futuru sira seluk ba parseiru dezenvolvimentu.

“Parte rua iha commitment atu implementa kedan Akordu Fronteira Marítima kuandu sira-nia prosesu doméstiku akordu nian kompleta ona no réjime regulatóriu foun iha ona akordu ho kompañia sira ne’ebé sira-nia interese sei muda tama ba teritóriu ekskluzivu Timor-Leste kuandu akordu ne’e vigór ona,” sita komunikadu MNEK ne’e.

Austrália, nafatin tuir komunikadu ne’e, salienta fali sira-nia suporta ba Timor-Leste nia esforsu atu sai membru Asosiasaun Sudeste-Aziátiku, Organizasaun Komérsiu Mundiál, no nasaun Commonwealth ne’ebé Austrália nu’udar membru fundadór.

Departamentu Negósiu Estranjeiru no Komérsiu Austrália nian sei sai uma na’in ba enkontru ofisiál seniór sira tuir mai iha tinan 2019 antes konversa kada tinan ba dahuluk entre ministru negósiu estranjeiru sira.

Ofisiál Timor-Leste no Austrália ne’ebé hasoru malu ohin ne’e kompostu Xefe Delegasaun husi Timor-Leste mak embaixadór Isílio Coelho, Diretór Jerál ba Asuntu Bilaterál MNEK.

Xefe delegasaun Austrália nian mak Julie Heckscher, Primeira Sekretária Adjuntu, Divizaun Sudeste-aziátiku, Departamentu Negósiu Estranjeirus no Komérsiu iha Canberra.

Jornalista: Rafy Belo

Editór : Manuel Pinto

HUSIK IDA HATÁN