KRF Halo Diagnóstika Ba APA Ho Kestionáriu

0
85
Koordenadora Reforma Fiskál, Fernanda Borges. Imajen António Goncalves

DILI, (TATOLI) – Komisaun Reforma Fiskál (KRF) halo diagnóstika ba Ajénsia Públika Autónoma (APA) ho kestionáriu hamutuk 183.

“Prosesu ne’e atu fó informasaun ba ajénsia sira no simu mós sira-nia hanoin, tanba hotu-hotu iha hanoin di’ak atu kontribui ba relatória diagnóstika nomós polítika foun ne’ebé reforma fiskál presiza prepara esbosu atu hato’o ba konsellu interministeriál ne’ebé Primeiru-Ministru rasik prezide, nune’e lori ba Konsellu Ministru aprova ho lejislasaun ne’ebé atu regula APA sira”, hatete Koordenadora KRF, Fernanda Borges, iha edifísiu Autoridade Aduaneira, ohin.

Koordenadora KRF hatutan liuhusi resposta sira ne’e, KRF análiza hodi halo diagnóstika ida bazea ba faktu, oinsá reforma ajénsia autónoma, taxa no enkargu.

Eis-deputada ne’e hatutan presiza mós kria lei inan ida sobre taxa no enkargu ne’ebé la’ós fiskál, nune’e asegura katak futuru APA sira bele kobra di’ak, transparénsia, sustentavel no aumenta reseita doméstika ba nasaun.

Sobre kestionáriu, KRF haruka ona iha tinan kotuk no agora kompila ona, nune’e hato’o fali ba ajénsia autónoma no ministériu sira bele haree fali sira-nia resposta, oinsá maka resposta sira ne’e tau hamutuk halo estatístika ida ne’ebé bele foti konkluzaun kona-ba lala’ok ajénsia autónoma no ministériu nian sobre prestasaun serbisu no reseita doméstika ne’ebé koleta.

“Sira-nia governasaun ne’e la’o halo oinsá, ne’e maka ita iha hanoin di’ak barak ne’ebé fó, hotu-hotu konkorda no kestiona buat barak ne’ebé ita presiza hadi’a, tanba sira rasik esperiénsia kestaun sira ne’e. Ne’ebé bá oin ita sei presiza koopera nafatin, halo sesaun hanesan ne’e para envolve hotu-hotu ne’ebé presiza envole iha preparasaun esbosu lei, relatóriu, polítika no lei ne’ebé presiza ba parlamentu”.

Iha diskusaun ne’e ko’alia mós sobre ajénsia autónoma sira ne’ebé eziste no kobre reseita, maibé balun dependente liu ba orsamentu Estadu, tanba ne’e Fernanda esplika iha ajénsia autónoma.

Ezemplu, nia temi Prokuradór Jerál no Tribunál sira ne’e laespera atu kobre reseita, tanba iha lei inan hatuur katak Estadu tenke prevee orsamentu ba sira, asesu justisa ba sidadaun sira.

“Maibé iha ajénsia autónoma seluk ne’ebé kria hodi fó prestasaun serbisu ruma, iha sustentabilidade fiskál iha futuru presiza haree saida maka sira bele kobra, kobra sé, ema ne’ebé ki’ak liu ne’e oinsá, ita fó apoiu ba sira, pergunta sira ne’e maka agora ami serbisu hela hodi bele prepara didi’ak, hato’o bá Governu depois bele lori bá Parlamentu”.

Jornalista: Maria Auxiliadora

Editora: Rita Almeida

Lee mós :

KRF Soru-Mutu Ho APA Atu Halo Polítika Koleta Taxa

HUSIK IDA HATÁN