DILI, (TATOLI) – Prezidente Repúblika (PR), Francisco Guterres Lú Olo, hatete Sua Santidade Amu Papa Francisco konvida no deseja xefe estadu timoroan atu bele vizita Roma no bele mós konvida Papa Francisco atu vizita Timor-Leste, maske nune’e depende autorizasaun husi Parlamentu Nasionál (PN).
“Ita-nia Amu Papa Konvida ha’u ba Roma i Amu Papa deseja tebes ha’u ba Roma. Bele mós hodi konvida Sua Santidade Amu Papa atu mai vizita Timor-Leste”, haktuir Xefe Estadu ba jornalista sira iha Sentru Konvensaun Dili, ohin.
Nia hatutan tan: “Konvite ofisiál tenke sai husi Prezidente Repúblika ba Amu Papa atu mai, embora nia iha vontade atu mai maibé tenke iha konvite ofisiál. Tanba ne’e mak núnsiu lori konvite mai hodi fó hatene i ha’u hein Parlamentu Nasionál mak bele deside”.
Prezidente Repúblika dehan programa vizita no konvida Sua Santidade mai Timor-Leste, país maioria Katóliku ne’e, programadu no pedidu ona antes ba Parlamentu, maibé depende desizaun orgaun lejislativu ne’e. “Ne’e uluk kedas ona, programa kedas”, subliña.
Entretantu, konvite Sua Santidade Papa Francisco ba TL hodi konvida Xefe Estadu liuhusi Núnsiu Apostóliku, Monseñor Joseph Marino, iha okaziaun hasoru malu ho Prezidente Repúblika, alende transmite saudasaun Amu Papa Francisco (Jorge Mario Bergoglio), antes ne’e iha TL.
Jornalista: Rafy Belo
Editora: Rita Almeida
