Komunikasaun Liuhusi Jornál no Rádiu Ba Foho Laduun

0
50
Premiandu Novel ba Pás, José Ramos Horta

DÍLI, (TATOLI)-Premiadu Nobel da Paz, José Ramos Horta konsidera katak komunikasaun, liliu intervensaun husi autoridade órgaun estadu nian hanesan Parlamentu, Governu, Prezidente Repúblika, Tribunál, inklui órgaun relevante sira laduun to’o iha populasaun sira iha área rurál tanba sirkulasaun mídia, barak iha de’it Díli.

“Oinsa mak intervensaun sira ne’e ita fahe didi’ak ho populasaun, tanba komunikasaun ba foho laduun. Jornál iha Díli barak, rádiu iha Díli barak maibé iha foho laduun,” dehan premiadu Nobel da Paz, José Ramos Horta, iha nia intervensaun, horseik (03/10) iha Ministériu Finansa, Aitarak laran-Díli.

“Oinsa mak ita halo esforsu liutan, buat ne’ebé ko’alia (parlamentu), prezidente repúblika, primeiru-ministru, opozisaun ko’alia, oinsá mak bele fahe di’ak liu ba populasaun atravéz rádiu, se lae ita sira iha ne’e (Díli) mak rona i la iha reprodusaun iha li’ur, mensajen pozitivu ruma karik; la iha,” reforsa tan diplomata seniór timoroan ne’e.

Nia rekoñese katak buat di’ak ne’e sai tradisaun, iha ámbitu debate mak transmisaun direta liuhusi rádiu no televizaun no konsidera katak aktu ida ne’e transparante tebes.

“Ne’e tradisaun ida iha Timor, pozitivu para atu ita halo nafatin ida ne’e,” konsidera eis-prezidente repúblika, José Ramos Horta perante Prezidente Parlamentu Nasionál, Arão Noe inklui lider másimu timoroan sira nomós sosiedade sívil no akadémika sira.

Entretantu, tuir relatóriu rezultadu levantamentu nasionál Konsellu Imprensa (KI), relatóriu nú 1, 10 maiu, totál mídia iha Timor-Leste hamutuk 50. Husi númeru ne’e, mídia imprime 10, mídia elektrónika 36 (rádiu 33, televizaun 3) no online iha haat.

Jornalista: Rafy Belo

Editór : Manuel Pinto

HUSIK IDA HATÁN