KM Aprova Dokumentu Espesiál Polítika Estratéjia Governu Ba Feto Rurál

0
130
Sekretária Estadu Igualdade no Inklusaun, Maria Jose da Fonseca Monteiro de Jesus. Imajen António Goncalves

DILI (TATOLI) – Governu liuhosi reuniaun Konsellu Ministru (KM) kuarta (10/10), aprova dokumentu espesiál ida, husi inisiativa Sekretaria Estadu Igualdade no Inkluzaun (SEII), hanesan kompromisu VIII Governu Konstitusionál hodi asegura governu nia Atuasaun liuhosi programa no polítika ne’ebé kontinua tau matan ba feto iha área rurál, dezde governu anterior.

“Konsellu Ministru ohin aprova dokumentu espesiál sira ne’ebé ministru sira asina, hanesan inisiativa husi Sekretaria Estadu Igualdade no Inkluzaun hanesan polítika estratéjiku ida husi VIII Governu Konstitusionál atu fó kontinuidade ba prosesu sira hala’o uluk ona, maibé buka mós konsolidasaun ba igualdade no inkluzaun”, Ministru Prezidénsia Konsellu Ministru, Agio Pereira esplika ba jornalista sira ohin, hafoin reuniaun ezekutivu iha Palásiu Governu.

Biban hanesan, Sekretária Estadu Igualdade no Inkluzaun, Maria José Fonseca Monteiro de Jesus, hatutan Konsellu Ministru ohin asina Deklarasaun Maubisi, hanesan faze daruak nian, ne’ebé deklarasaun faze dahuluk asina ona iha tinan 2015, ba tinan rua ne’ebé remata ona iha tinan 2017.

Ida ne’e hanesan kompromisu ida mak VIII Governu iha no kontinua husi governu anterior, atu asegura katak governu nia Atuasaun liuhosi programa no polítika sira kontinua tau matan ba ema sira iha área rurál. Nune’e, liuhosi Deklarasaun Maubisi ne’e hakarak feto sira iha área rurál hetan hotu benefísiu.

Feto la’ós feto de’it, maibé ema ho defisiénsia mós, ne’ebé hela iha área rurál atu hetan benefísiu husi atividade no programa oin-oin ne’ebé mak instituisaun estadu 15 hola parte.

Nune’e iha instituisaun estadu hamutuk 15 mak asina Deklarasaun Maubisi, ne’ebé sei lansa iha 12 Outubru hodi selebra mós loron internasionál feto rural.

Loron internasionál Feto Rurál, loloos monu iha loron 15 Outubru, maibé tanba ezame nasionál, entaun SEII deside atu selebra loron ne’e iha 12 outubru.

Governante ne’e mós realsa, deklarasaun faze daruak ne’e hanesan kompromisu instituisaun estadu hamutuk 15 atu asegura, katak liuhosi portfolio instituisaun ida-idak nian, feto sira iha área rurál bele hetan benefísiu iha dezenvolvimentu ne’e tomak.

Atuasaun husi instituisaun ida-idak sei asegura, nune’e tau iha Deklarasaun Maubisi atu sai hanesan kompromisu instituisaun ida-idak nian, ne’ebé sei implementa iha tinan lima nia laran.

Deklarasaun Maubisi faze daruak ne’e husi tinan 2018 to’o 2023, nune’e SEII mak sei sai hanesan instituisaun estadu ida ne’ebé atu halo monitorizasaun ba implementasaun kompromisu ne’ebé tau ona iha Deklarasaun Maubisi.

“Ami sei servisu hamutuk ho instituisaun hotu ne’ebé mak asina deklarasaun ne’e, no Primeiru-Ministru mak sei sai sasin ba deklarasaun ne’e, no sei servisu ho instituisaun sira atu asegura katak ita implementa duni saida mak ita tau iha Deklarasaun Maubisi iha tinan lima nia laran”, informa.

Ministériu ne’ebé mak asina Deklarasaun Maubisi mak Ministériu Edukasaun, Ministériu Obras Públika, Ministériu Agrikultura no Peska no ministériu seluk tan.

“Liuhosi Ministériu Agrikultura no Peska, ita atu asegura katak feto rurál sira, ne’ebé ho maioria servisu iha parte agrikultura nia, bele hetan benefísiu ba programa ou atividade saida mak ministériu ne’e halo. Ezemplu bainhira ministériu atu fahe fini karik, ita hakarak asegura katak feto iha área rurál, ne’ebé hanesan toss no natar na’in mós bele hetan asesu ba fini ne’ebé mak ministériu fahe, selae sira mós bele hetan benefísiu ba ekipamentu ba agrikultura.”

Nune’e mós nia akresenta, ba edukasaun nian, sei ministériu atu adopta no implementa polítika fila hikas ba eskola. “Ita hakarak asegura katak ida ne’e implementa mós ba alin feto sira ne’ebé mak estuda iha área rurál sira”.

Antes ne’e, iha loron 15 Outubru governu selebra loron Internasionál Feto Rurál, iha Maubisi ba feto rurál sira no loron Mundiál ba Ai-han nian.

Selebrasaun sira ne’e inklui vizita ba kampu iha Aileu, kolókiu (Salaun Parokiál Maubisi nian), espozisaun produtu lokál sira, semináriu, konkursu, ezibisaun filme kona-ba feto rurál sira (Kampu Futeból Maubisi nian), no seluk tan, konaba produsaun ai-han, nutrisaun no apoiu husi lider sira ba feto rurál sira.

Jornalista: Julia Chatarina

Editór : Manuel Pinto

HUSIK IDA HATÁN