Investimentu Setór Turizmu Seidauk Másimu

0
66
Diretór Jerál Turizmu Ministériu Turizmu, Komérsiu no Indústria (MTKI), José Filipe Dias Quintas. Foto/Egas.

DILI, (TATOLI) – Diretór Jerál Turizmu Ministériu Turizmu, Komérsiu no Indústria (MTKI), José Filipe Dias Quintas, hatete investimentu iha setór turizmu seidauk másimu tanba ne’e Timor-Leste tenke investe.

Nu’udar país joven ne’ebé haree katak indústria turizmu ne’e importante maka Timor-Leste tenke investe, tanba iha Planu Estratéjiku Dezenvolvimentu Nasionál (PEDN) temi klaru, setór turizmu sai buat ida ne’ebé prinsipál bainhira mina-rai maran maka bele avansa setór ne’e.

“Maibé iha realidade ita akompaña investimentu mak seidauk másimu. Ita haree nasaun Indonézia no Nova Zelándia, sira lahalimar ho investimentu, investe maka’as, entaun ne’e bá oin sai hanesan trabalho de casa ida ba ita hotu, liuliu ba ita-nia Governu para komesa haree to’o iha tempu ida setór ne’e bele avansa no bele mós troka setór Mina-rai iha futuru”, Quintas afirma iha Fatuhada, kinta ne’e.

Quintas hatutan sobre impedimentu ba dezenvolvimentu turizmu iha nasaun ne’e maka rekursu umanu no infraestrutura ne’ebé prinsipál liu bainhira ko’alia indústria turizmu.

“Liuliu aeroportu, se ita hakarak aumenta xegada ema tama mai Timór barak, entaun infraestrutura aeroportu nomós portu tenke di’ak. Ita hotu akompaña tinan-tinan ró kruzeiru sira mai kadavés ema 2000 resin, maibé ita haree fali oinsá maka ita-nia infraestrutura ladezenvolve, entaun ita-nia na’i-ulun sira maka tenke haree didi’ak karik ita tenke responde ba merkadu. Kuandu ita haree ró kruzeiru mai barak, ita mós komesa investe labele depende de’it ba parseiru dezenvolvimentu sira”, katak.

Sobre orsamentu ba turizmu nian iha 2018 ne’e, tanba situsaun polítika rai-laran nune’e seidauk bele halo buat ida no ba 2019 nian iha temu badak sei diskute no bainhira aprova ona mak oinsá maka bele ko’alia no halo buat ida iha tinan oin.

Tuir PEDN 2011-2030 Timor-Leste sei fó benvindu ba turista internasionál na’in-200.000 kada tinan, ne’ebé sei prodús rendimentu milliaun $150 no fó empregu direta ba traballadór na’in-15.000.

“Maibé to’o iha 2030 númeru 200.000 ne’e to’o ka la’e? Se to’o karik saida mak Governu tenke halo, entaun importante liu maka ita-nia infraestrutura, liuliu otél sira ne’e to’o ka la’e? Ema 200.000 mak mai tinan ida kama sira ne’e to’o ka la’e?”.

Nia dehan bazea ba dadus kama sira ne’e pur volta 2000 resin no ida ne’e sai preokupasaun Governu nian, maibé labele depende de’it ba Governu, setór privadu sira mós komesa haree tanba tuir ba dadus turista komesa sa’e ona no saida maka tenke prepara.

Tuir dadus iha tinan haat ba kotuk 2014, iha ema rihun 18 mak mai Timor-Leste no hatama milliaun $14 no iha 2017, Timor-Leste hatama ona milliaun $25 husi vizitante hamutuk rihun 70 ne’ebé mai país ne’e.

Jornalista: Maria Auxiliadora

Editora: Rita Almeida

HUSIK IDA HATÁN