DILI, (TATOLI)-Ministériu Finansas (MF) susesu halo rekonsiliasaun ba data migrasaun, nune’e Planeamentu Rekursu husi Governu (GRP, sigla iha Inglés) funsiona ona porsentu 100 hanesan normál katak atualiza ona ho Orsamentu Jerál Estadu (OJE) 2018 no gastu Dotasaun Orsamentu Temporáriu (DOT) ne’ebé antes ne’e públiku kestiona tanba lala’o ho normál.
Xefe Unidade Sistema Integradu Informasaun Jestaun Finanseira (USIIGF) MF, Joanico Pinto, informa katak ohin GRP funsiona porsentu 100 iha nia funsionamentu diária.
“Katak rekonsiliasaun entre gastu DOT versus alokasaun OJE 2018 konklui ona iha sistema, nune’e husi ohin bá oin instituisaun Estadu hotu bele ona kontinua prosesa sira-nia pagamentu sira liuliu CPV (kompromisu no fatura pagamentu) sira ne’ebé iha coding block (kódigu blokeia) tuan automátikamente transfere ba coding block foun ka sira bele kontinua de’it prosesu, ne’e iha sira-nia desizaun”, Joanico hatete iha MF, ohin.
Nia hatutan komesa ohin ekipa MF mós kontinua halo hela serbisu hodi atualiza sistema relatóriu nian hanesan portál transparénsia no crystal report ne’ebé instituisaun sira utiliza normalmente.
“Dentru semana ida ami espera katak prosesu bele remata no portál transparénsia bele loke fali ba públiku para kontinua atualiza prosesu ezekusaun. Ne’ebé prosesu rua ne’e interdependénsia ba malu katak ita labele halo rua ne’e dalaida, tenke finaliza ida mak hanesan baze hodi kontinua ida seluk”, katak.
Hatán sobre ezekusaun orsamentu iha institusaun ne’ebé antes ne’e hetan problema, Joanico dehan bainhira prosesu sira ne’ebé halo tiha ona iha kódigu blokeia tuan ne’e sei larepete halo foun, tanba tranzita automátika iha foun ne’e.
“Ho konsidersaun ba tempu karik sira hahú tiha ona sistema lapresiza halo foun, signifika katak kada instituisaun iha nia autoridade atu deside será ke ida ne’e hakarak kontinua ka halo foun, liuliu liga ba kompromisu, obrigasaun ho prosesu seluk ne’ebé sira inisia tiha ona iha coding block tuan ne’e”.
Ho ida ne’e MF konfirma ona katak iha protidaun husi dadus sira ne’ebé presiza asenta ne’e atu halo rekonsilia ba malu hanesan iha semana kotuk tanba instituisaun balu afetadu ne’e, hahú ohin hotu-hotu konfirmadu katak sira-nia orsamentu hanesan ona ho lei orsamentu nian no prosesu sira hotu lori ona ba iha estrutura foun.
Tranzisaun dadus hotu ne’ebé iha kódigu blokeia tuan ba foun ne’e konsege halo ho susesu iha tuku rua madrugada ohin hafoin MF halo ezersísiu lubuk ida.
Jornalista : Maria Auxiliadora
Editór : Manuel Pinto
