Governu Timor-Leste Lansa Primeiru Peskiza Sízmiku iha Kosta Súl

0
216
Reprezentante Primeiru-ministru, ministru defeza, Filomeno da Paixão de Jesus lansa peskiza sísmika iha Aeroportu Internasionál Kay Rala Xanana Gusmão, Suai-Covalima-Kosta Sul Timor-Leste, kuarta lorokra'ik (10/10). Foto TATOLI: Rafy Belo

COVALIMA, (TATOLI)-Governu Timor-Leste liuhusi ministru defeza, Filomeno da Paixão de Jesus reprezenta primeiru-ministru, ho Autoridade  Nasionál Petróleu no Minerál (ANPM) hamutuk ho TIMOR RESOURCES Pty Ltd no TIMOR GAP,E.P lansa peskiza Sízmiku Fafulu 2D, iha Aeroportu Internasionál Kay Rala Xanana Gusmão, Suai-Covalima-Kosta Súl Timor-Leste, kuarta lorokra’ik (10/10), ne’ebé sei inklui mós Hatudo, Munisípiu Ainaro no iha Same ho Alas, Munisípiu Manufahi. 

Foinsa’e Covalima dansa kultura Simu bainaka sira. Foto TATOLI: Rafy Belo

Peskiza Sízmiku Fafulu 2D ne’e bazea ba Kontratu Fahe Produsaun (PSCs) TL-OT-17-08 no TL-OT-17-09. Kontratu fahe produsaun rua hanesan kontratu petróleo rai maran dahuluk ba Timor-Leste ne’ebé asina iha loron 7 abril 2017.

Kontratu fahe produsaun (PSCs) rua ne’e fó ba kompania TIMOR GAP Onshore Block Unipesoál, Lda-Kompania subsidiáriu husi kompania estatál TIMOR GAP, E.P no TIMOR RESOURCES Pty Ltd, kompania ida husi Austrália ne’ebé hola parte iha Kompania Nepean Group.

Kada konsórsiu iha interese pursentu 50 no TIMOR RESOURCES mak hola funsaun hanesan operadór. Rekerimentu mínimu ba serbisu peskiza iha périodu dahuluk husi kontratu PSC ne’e inklui akizisaun ka peskiza Sízmiku Fafulu 2D ho liña kilometru 100 ba kada PSC. Iha peskiza Sízmiku ba Fafulu 2D ne’e, TIMOR RESOURCES, Pty Ltd no ninia parseiru sira sei atinji liña peskiza ho totál kilometru 308,4.

Kontratu rua ne’e, sei kobre área ne’ebé iha prospetividade aas no iha fatin ne’ebé bele observa gás no mina iha rai leten. Peskiza Sízmiku Fafulu 2D hanesan étapa krusiál ida hodi identifika prospetividade ba perfurasaun iha área PSC rua ne’e.

Embaixadór Austrália ba Timor-Leste, Peter Robert konversa ho ministru defeza, Filomeno de Paixão de Jesus nomós Vise-prezidente Nepean Resources no diretora jerál Timor Resources, Suellen Osborne akompañadu husi administradór Afonso Nogueira Nahak. Foto TATOLI: Rafy Belo

Reprezentante primeiru-ministru, Ministru Defeza, Filomeno da Paixão de Jesus, hafoin lansamentu, ba jornalista sira katak parseria entre TIMOR RESOURCES ho ita-nia kompania mina nasionál enkoraja tebes no peskiza Sízmiku Fafulu 2D marka susesu ne’ebé signifikativu hodi dudu ba oi ita-nia indústria mina no gás iha rai maran nian.

“Peskiza sízmiku ne’e mós hanesan ezemplu ida katak Timor-Leste prontu ona atu loke oportunidade ba investimentu ho valór millaun dolár,” dehan ministru defeza, Filemeno da Paixão de Jesus.

Ministru Filmeno da Paixão hatutan tan katak importante liu atu serbisu hamutuk hodi rekonsilia objetivu kompania nian, governu hodi aumenta kapasidade serbisu na’in sira. “Dezenvolve indústria fornesedór lokál ba standar (padraun) internasionál nian, nune’e mós bele aumenta serbisu ba komunidade sira iha área afetadu no sira ne’ebé hela besik no multiplika serbisu fornesimentu,” esplika governante ne’e.

Ministru defeza, Filomeno da Paixão mós informa katak polítika governu, liliu ministériu defeza nian mak atu bele garante seguransa ba área sira ne’e, maske nune’e tuir nia, la’ós preokupasaun eh responsabilidade ministériu defeza nian de’it, maibé órgaun governu tomak, parlamentu tomak, prezidente repúblika; sira hotu iha konsensu atu haree formasaun autoridade marítima atu halo nusa Falintil-FDTL (Forsa Defeza Timor-Leste) ho PNTL (Polísia Nasionál Timor-Leste) no instituisaun seluk ne’ebé halo parte iha sistema autoridade marítima.

“Ami atu hamutuk tau-matan ba iha Kosta Norte no Kosta Súl através akizisaun ró ida,” haktuir governante ne’e.

Ministru defeza ne’e mós apela ba sidadaun hotu hakmatek, kria dame nafatin hodi nune’e dezenvolvimentu bele la’o, liliu hodi kolabora iha atividade peskiza ne’e to’o perfurasaun.

Viatura ba peskiza sísmiku

“Se ita hakarak moris di’ak, ita hakarak muda vida, tuur nonok, iha dame, hadomi malu, haree malu di’ak ho kontribuisaun rona na’i ulun sira, sosiedade sívil autoridade militár, polisiál mós ita fiar; ambiente ida prospéru, ambiente ida kondusivu. Povu agora ne’e konsiente ona, haruka oan sira, beioan sira ba eskola,” dehan ministru defeza, Filomeno da Paixão de Jesus.

Enkuantu iha nia diskursu, ministru defeza ne’e mós alerta ba komunidade sira katak ema hotu tenke fó seguransa maka’as iha Kosta Sul ne’e, labele iha perturbasaun oituan ida ba iha orden públiku nian.

“Para depois kompania sira ne’e, ema mai ho konfiansa, hakarak serbisu, ema fó laran, ema serbisu ho laran, la iha buat ida ba sira-nia isin-lolon, ema nia sasan; riku ne’ebé iha ne’e nunka mais aat. Ne’e importante tebes,” apela ministru defeza, Filomeno da Paixão de Jesus.

Tanba ne’e, tuir governante ne’e, governu fó fiar ba nia la’ós atu apela de’it ba populasaun maibé ezije katak se ita hakarak moris di’ak tenke iha ejizénsia ba ita-nia aan rasik.

“Ita hotu iha ne’e moris di’ak, hakarak moris di’ak liutan ida ne’e, mak ida ne’e, dalan mak governu hatudu ne’e, dalan mak kompania Timor Resources mai ho Timor Gap, ita haree iha ne’e, embaixadór Austrália (Peter Robert) mós iha, la’ós mai saugati. Mai iha ne’e hatudu governu Austrália ba iha empreza ne’e ho nia emprendimentu ne’ebé atu halo,” haklaken ministru Filomeno da Paixão de Jesus.

Nia akresenta, tanba ne’e ita fiar no ita iha konfiansa katak ita-nia mina ne’e tenke sai. “To’o tempu ona Maromak no ita-nia avó hatudu mina mai ita para muda ita-nia vida. Ida ne’e de’it mak ha’u-nia apelu no ejizénsia ba imi hotu,” apelu tan ministru defeza ne’e.

Iha fatin hanesan, prezidente ANPM (Autoridade Nasionál Petróleo no Minerál), Gualdino da Carmo da Silva hateten katak lansamentu ida ne’e nu’udar komprimísiu kontratuál ba segundu ano ninian husi kontratu sira ne’ebé mak kompania sira halo ona ho governu liuhusi ANPM.

“Tanba ne’e, sira sei halo fulan walu ba tinan ida nia laran, rezultadu di’ak hotu sira sei hakat ba oin katak sira sei halo perfurasaun ba mina-matan iha Same nomós iha Suai. Mas agora, ba fulan walu mai agora ne’e sira sei fokus liu ba iha atividade sísmiku,” informa prezidente Gualdino da Silva.

Prezidente ANPM ne’e haktuir katak bloku ne’ebé kompania iha mak Bloku A no C, ne’ebé mak sira iha ona direitu liuhusi kontratu ho governu ne’e entaun kompania mós bazea ba dadus ne’ebé sira iha.

“Bazea mós dadus istóriku katak iha fatin rua ne’e iha duni poténsia minarai liliu petróleo. Tanba ida ne’e mak sira bazea ba dadus sira ne’e hotu, sira hakarak atu esplora, ba buka se iha duni petróleo ka lae? Ne’e mak halo liuhusi atividade sísmiku ne’e,” nia realça.

Nia mós informa, iha peskiza sísmiku bainhira uza métodu vibrasaun ne’e halo rai nakdoko ba lokál de’it no la sente tanba frekuénsia aas nune’e sei la iha impaktu ba populasaun sira.

“Distánsia husi 50m to’o 100m ita la sente ona. Iha frekuénsia ne’ebé mak aas katak husi 10 to’o 50 Htz tanba ida ne’e mak ita laduun sente ida. Maibé, ita buka, ita halo mitigasaun ona distánsia ne’e 50 to’o 100m ne’e dook husi populasaun nia uma, kuandu besik uma, ita dezvia atu nune’e labele fó impaktu ba populasaun nia uma,” esplika prezidente ANPM, Gualdino da Silva.

Vise-prezidente Nepean Resources no diretora jerál Timor Resources, Suellen Osborne, iha entrevista ho jornalista sira afirma, peskiza sísmiku ne’e sei hala’o durante loron 60 nia laran, hahú husi área Suai, Covalima nian ba to’o iha Same, Manufahi.

“Ba perfurasaun, konserteza hetan aprovasaun husi governu, liuhusi Autoridade Nasionál Petróleo no Minerál, planu husi kompania nian mak halo perfurasun iha 2019, iha fulan abril nia laran.

Kona-ba garansia, diretora jerál Timor Resources, Suellen Osborne hateten: “Kompania labele hateten katak iha duni mina ka lae, maibé hanesan kompania, ami uza ema matenek barak ne’ebé iha kapasidade ba área ida ne’e, nune’e mós uza teknolojia ne’ebé mak avansada hodi bele hetan dadus ne’ebé mak bele hateten área ne’ebé iha potensialidade hodi halo perfurasaun no”

Ariska Milaun 35

Diretora jerál Timor Resources, Suellen Osborne konsidera katak jeolojia Timor-Leste nian susar. Atu hetan mina la’ós fásil, biar sísmiku ne’ebé atu hala’o.

“Timor Resources hanesan kompania ne’ebé atu investe, sei ariska besik dolár amerikanu milaun 35 molok atu iha serteza saida mak bele hetan iha rai okos. Target boot liu iha dalan ida ne’e mak atu remata ho gravasaun sísmiku,” hateten diretora Timor Resources ne’e.

“Ami sei halo gravasaun liuhusi komunidade Suai, Hatudo, Manufahi no Alas, data ne’e sei hetan intrepretasaun husi ami-nia espesialista, hatama iha modelu jeolójiku hodi bele tuir atu hahú fura,” nia reforsa.

Diretora australiana ne’e haklaken, iha negósiu nomós iha politika, hetan bebeik krítika, maibé nia reforsa katak ho lansamentu peskiza sísmiku ne’e hahí, fó  basa liman ba governu nia hanoin  hodi hala’o peskiza  ho aviaun hanesan rider  gravidade ho magnetiku.

“Fiar katak, ita bele espera rekursu folin mina nian bainhira ami basa liman atu hala’o projetu ida ne’e halao venture ho kompania Timor gap kona-ba mina. Ekonomia momentu ne’eba laduun di’ak mina baril ida dolár haat nolu resin lima de’it ida ne’e folin tuun tebes-tebes, maibe ami hatene katak, nasaun nia rikusoin boot ne’ebé fo korazen nafatin ami atu halao servisu ba oin,” nia lembra hikas.

Diretora jerál Timor Resources, Suellen Osborne espera katak ho lideransa TIMOR GAP no ANPM nian, sira sei hetan fiar hodi lori rezultadu ba Timor-Leste, no ba oin nafatin. Nune’e mós, ho dezenvolvimentu ne’ebé mak Timor Resources  atu hala’o ne’e  sei fó estabilidade ba nasaun  atu bele hala’o nia dezenvolvimentu  makas liu tan.

“Esplorasaun ne’e hanesan dalan ida importante iha dezenvolvimentu ne’ebé ita presiza iha rai ida ne’e, hakat ne’ebé ita hatoo hetan risku maibé dalan ida ne’e ita prepara atu hala’o ba oin nafatin. Hanesan kompania ami sei kompremete aan atu sai hanesan operadór iha ambiente ne’ebé ho responsabilidade atu hala’o serbisu ho didi’ak,” kompromete diretora ne’e.

“Saúde no seguransa asuntu ida ne’ebé importante tebes iha organizasaun ida ne’e nomós mai ami importante, ami sei miniza impakatu sobre buat ne’ebé sala, iha sasan ne’ebé ami book hodi hala’o dezenvolvimentu ida nee, ami haree katak bainhira serbisu di’ak sei hametin parseiru naruk atu bele serbisu hamutuk ho rai na’in sira, na’in ba rai sira para hothotu bele la’o hamutuk harii nasaun foun, kondisaun ho ambiente foun, ho serbisu ida ne’ebé hothotu bele fiar malu, troka esperiénsia hamutuk hodi hala’o serbisu ne’e ba oin,” nia konklui.

Padre Paróku Covalima, amo Sebastião Correia fó bensa no hisik bee santu ba viatura ba peskiza sísmika nomós reprezentante lia na’in hisik bee nu’udar símbolu matak malirin. Foto TATOLI: Rafy Belo

Iha fatin hanesan, reprezentante administradór Munisípiu Ainaro no Manufahi, adminitradór Covalima, Afonso Nogueira Nahak akresenta katak sei halo koordenasaun di’ak hodi asegura investimentu sira, hodi lori benefísiu ba Timor-Leste inkluzivamente Suai, Ainaro no Manufahe.

“Ita hein katak sei serbisu hamutuk hodi nune’e lori benefísiu mai ita, liliu ba joven sira aban bainrua, iha futuru,” espera administradór Afonso Nogueira Nahak.

Entretantu, lansamentu peskiza sísmiku ne’e hetan bensaun direta husi Padre Pároku Covalima, amo Sebastião Coreia no hetan matak malirin husi lia na’in munisípiu tolu ne’ebé mak sai alvu ba peskiza ne’e.

Iha lansamentu ne’e demonstra mós oinsa operasaun tékniku nomós vibrasaun aparellu peskiza nian no asiste direta husi autoridade lokál, munisípiu, reliojoza, entidade relevante nomós komunidade sira, inklui diplomata estranjeiru sira balun ne’ebé nia rezidénsia iha Timor-Leste.

Jornalista: Rafy Belo

 Editór : Manuel Pinto

HUSIK IDA HATÁN