Governu Tau Esperansa Ba Mídia Atu Sensivel Jéneru

0
120
Sekretária Estadu Igualdade no Inklusaun, Maria Jose da Fonseca Monteiro de Jesus, akompaña hosi Sekretáriu Estadu Komunikasaun Sosiál, Mericio Juvenal dos Reis Akara, hamutuk ho parseiru sira, ohin loke formasaun kona-ba igualdade jeneru ba profesionál mídia komunikasaun sosiál iha salaun Maria Goreti, Obrigado Barack Kaikoli. Imajen António Goncalves

DILI, (TATOLI) – Governu liuhosi Sekretariu Estadu Komunikasaun Sosiál no Sekretariu Estadu Igualdade no Inkluzaun, hamutuk ho parseiru sira kontinua tau esperansa ba mídia atu sensivel ba jéneru.

Ho esperansa ne’e, governu ho maksahik (parseiru) hanesan Konsellu Imprensa, Programa Monitorizasaun Sistema Judisiál (JSMP-sigla inglés), Fundasaun Ázia, oferese formasaun ba profesionál komunikasaun sosiál sira kona-ba reportajen sensivel ba jéneru durante loron lima, hahú ohin to’o sesta semana ne’e.

Sekretáriu Estadu Komunikasaun Sosiál (SEKOMS), Merício Juvenal dos Reis Akara, durante abertura husu ba jornalista no kargu xefia sira iha mídia atu aproveita, nune’e bele hadi’a notísia sira ne’ebé durante ne’e públiku kestiona, tanba la sensivel ba jéneru.

Tuir nia reportajen ne’ebé durante ne’e mosu iha públikasaun sira, dalabarak fó todan liuba vítima. Tanba ne’e oportunidade refere bele hamosu produtu jurnalizmu ne’ebé bazea ba jéneru.

Sekretária Estadu Igualdade no Inklusaun, Maria Jose da Fonseca Monteiro de Jesus. Imajen António Goncalves

Nune’e mós Sekretária Estadu Igualdade no Inkluzaun, Maria Jose da Fonseca Monteiro de Jesus, haforsa mensajen hosi SEKOMS, husu atu reportajen jornalistíku sensivel ba jéneru.

“Formasaun ne’e la’ós dahuluk maibé sei kontinua atu atinje sensivel jéneru”, katak nia hodi hatutan objetivu hosi programa ne’e mak asegura produtu jornalismu bele sensivel jéneru no prevene violénsia bazea ba jeneru no violénsia doméstika.

Ba jornalista sira, Maria Fonseca mós esplika kona-ba polítika governu hodi kompromete implementa mak fila hikas ba eskola. Liuhosi ministériu edukasaun, juventude no desportu servisu hamutuk ho parseiru sira atu enkoraza estudante feto sira ne’ebé hasoru problema, liuliu ho kondisaun kosok-oan iha knotak atu kontinua eskola.

Matéria durante formasaun mak igualidade jéneru no violénsia bazeia ba jéneru, lei kontra violénsia doméstika, prevalénsia violénsia hasoru feto iha Timor-Leste (estudu baze), mídia bele kontribui ba igualdade jéneru, komprende kauza ba violénsia hasoru feto, sistema legál, hasa’e konsiénsia igualdade jéneru, polítika mídia ba asuntu Igualdade jéneru, jornalista sira nia servisu no responsibilidade étiku.

Jornalista: Rita Almeida

HUSIK IDA HATÁN