Governu Sei Investe Maka’as Iha Teknolojia

0
97
Primeiru-Ministru, Taur Matan Ruak, bainhira partisipa konferénsia rejionál, Konsellu Diretiva organizasaun ministru edukasaun hosi nasaun sira sudeste áziatika (SEAMEO INNOTECH) ne’ebé partisipa hosi nasaun membru 11 ba dala 62 iha salaun Otél Ramelau Dili, ohin. Imajen GPM

DILI, (TATOLI) – Primeiru-Ministru, Taur Matan Ruak, hateten polítika governu  atu investe maka’as iha área teknolojia  ba inovasaun foun hodi apoiu prosesu aprendizajen hahú hosi nivel báziku to’o universidade, sentru formasaun no instituisaun Estadu sira.

Xefe Ezekutivu hato’o polítika ne’e bainhira partisipa konferénsia rejionál,  Konsellu Diretiva organizasaun ministru edukasaun hosi nasaun sira sudeste áziatika (SEAMEO INNOTECH) ne’ebé partisipa hosi nasaun membru 11 ba dala 62 iha salaun Otél Ramelau Dili, ohin.

Mudansa teknolojia iha kapitál sai sentru estudu ba teknolojia, harii biblioteka modernu, kampus Universidade Nasionál Timor Lorosa’e iha Hera no seluk tan.

ʺAmi sei halo koneksaun hosi  sentru inovasaun teknolojia ba rede teknolojia, harii mos iha sentru kulturál ho infraestutura modernu  ho multi funsaun diferente iha área arte,  kultura, desportivu ba foinsa’e siraʺ, dehan tan.

Eis-Prezidente Republika ne’e promete sei haluan tan  investimentu  ne’e alende nivel nasionál no munisípiu  to’o rejionál no mundiál.

Governu aproveita instalasaun rede fibre optiku ho trasmisaun eletrisidade direta ba eskola, sentru formasaun no instituisaun Estadu hotu iha teritóriu.

Nune’e mós instala fibre óptiku iha tasi okos hodi halo koneksaun ho nasaun sira iha mundu ba rede informasaun no teknolojia globál.

Mesmu TL nasaun foun, maibé durante tinan 16 governu  harii infrasestutura bázika, sentru formasaun, dezenvolvimentu rekursu umanu, eskola tinan sia  gratuita, oferese bolsu estudu ba timoroan iha universidade no sentru formasaun sira iha rai-liur.

Maibé Xefe Governu ne’e hateten sei esforsu atu investe barak liután ba dezenvolvimentu nasaun foun ne’e.

TL aproveita teknolojia atu povu sai intelektuál, kreativu, inovativu ho kapasidade hodi dezenvolve sai atividade negosiu iha setór agrikultura (agronegósiu), indústria mina no gás, turizmu, transporte, peska no seluk tan.

Ministra Edukasaun, Juventude no Desportu, Dulce de Jesus Soares, hateten ba futuru governu sei harii sentru inovasaun no teknolojia hodi dezenvolve rekursu umanu kualifikadu.

Iha SEAMEO ne’e iha sentru oi-oin, maibé agora ne’e ko’alia de’it kona-ba sentru inovasaun teknolojia no peskiza.

Ministériu Edukasaun hosi rejiaun sudeste áziatiku sai mós membru ba organizasaun SEAMEO hanesan Filipina, Tailándia, Brunei Darusalam, Malazía, Timor-Leste, Mianmar, Indonézia, Vietname, Singapura no seluk tan.

Timor-Leste mak sai uma nain ba konferénsia ne’e. Hahú ohin no termina loron 4 fulan-outobru 2018.

Iha abertura ne’e, SEAME asina memorandum ho UNTL, Universidade Dili (UNDIL) no SEPFOPE hodi dezenvolve inovasaun teknolojia.

Jornalista: Agapito dos Santos

Editora: Rita Almeida

HUSIK IDA HATÁN