Governu Hahú Fali Kampaña Kombate Infesaun Lumbriga

0
57
Ministériu Saúde hahú fali kampaña kombate lumbriga hodi fahe aimoruk ba estudante sira iha Eskola Nobel Pás, Kintal Boot, ohin. Imajen Egas Cristovão

DILI, (TATOLI) – Governu liuhosi Ministériu Saúde (MS) hahú fali kampaña kombate infesaun lumbriga liuhosi maneira fahe aimoruk ba alunu sira iha eskola sira iha Dili laran no sei kontinua tama sai uma, nune’e benefisiáriu hosi aimoruk ne’e mak labarik ho tinan 1 to’o 15.

“Ita iha semana rua, hahú iha 1 outubru sei fahe aimoruk ba alunu sira hodi tama sai eskola, iha 8 to’o 12 fulan ne’e, sei tama sai uma hodi fahe aimoruk ba labarik ho idade 1 to’o 15”, katak Diretór Nasionál Saúde Públika hosi MS, Pedro Canisio da Costa Amaral, ba TATOLI hafoin fahe aimoruk ba estudante sira iha Eskola Nobel Pás, Kintal Boot, ohin.

Pedro Canisio haktuir tinan kotuk programa ne’e hala’o iha munisípiu 12 inklui Rejiaun Autoridade Enklave Oekusi Ambenou RAEOA) hotu ona.

Tinan ne’e programa ne’e kona fali munisípiu Dili, tanba bazea ba rezultadu peskiza ne’ebé hala’o iha 2012 hatudu, kapitál kuaze porsentu 55 hetan infesaun lumbriga hada’et hosi rai. Tanba ne’e mak atu kombate tenke fahe aimoruk liuhosi eskola iha munisípiu Dili hotu inklui tama uma no sai uma.

Parte seluk, Reprejentante Organizasaun Saúde Mundiál (OMS) iha Timor-Leste, Rajesh Pandav, agradese ba servisu saúde munisipiu Dili no sentru saúde komunitáriu neen ne’ebé nu’udar implementadór hosi MS nian no sira hanesan liña importante ne’ebé presiza atu kobre ema hotu iha Dili.

Nia parte agradese mós apoiu orsamentu ne’ebé Governu Republika Korea oferese liuhosi Ajénsia Kooperasaun Internasionál Koreanu (KOICA) ba projetu ho naran Programa Integradu ba Kontrola no Eliminasaun Moras Neglijénsia trópiku iha Timor-Leste hosi tinan 2016 to’o 2021 ho totál $6,337,504.00.

Enkuantu, dezde 2001 rezolusaun Asembleia Mundiál Saúde númeru 50.29 enkoraza membru nasaun hotu elimina moras lumbriga hada’et hosi rai nu’udar problema saúde públiku no asegura asesu ba aimoruk esensiál kombate infesaun lumbriga.

Objetivu ida atu atinje meta mínimu hosi administrasaun regulár ba porsentu 75 to’o 100 ba labarik eskola hotu no pre-eskolár sira ne’ebé mak iha risku hetan moras iha tinan 2010.

Fahe aimoruk masál hanesan estratejia ne’ebé rekomenda hosi OMS atu kontrola ka elimina moras neglijénsia trópiku balun ne’ebé mak aimoruk hirak ne’e fahe ba populasaun hotu ne’ebé iha risku.

Kobertura aas fahe aimoruk masál iha área endémiku ho objetivu atu hamenus transmisaun hosi infesaun ba membru komunidade no prevene hetan moras ne’ebé kauza tanba infesaun.

Tuir peskiza nasionál ba parazita iha 2012 hala’o iha Timor-Leste, hatudu infesaun lumbriga hada’et hosi rai sai hanesan problema saúde públiku iha Timor-Leste no Estadu hatudu prevalénsia aas liu iha Dili ho porsentu 55.

Iha 2014, MS dezenvolve ona planu ba programa integradu ba kontrola moras neglijénsia iha Timor-Leste, ba 2015 to’o 2020 hodi hatan ba moras neglijénsia trópiku.

Reprezentante OMS kongratula Governu liuhosi MS ne’ebé  mak ho susesu kompleta ona fahe aimoruk masál ba ronda daruak nian iha 2017 ne’ebé atinje kobertura meta globál besik porsentu 75, liuhosi tékniku no finanseiru hosi WHO no KOICA.

Jornalista: Zezito Silva

Editora: Rita Almeida

HUSIK IDA HATÁN