DILI (TATOLI)—Primeiru Vise Ministru Relasaun Exteriores Cuba, Marcelino Medina, halo audénsia ho Prezidente Repúblika, Francisco Guterres Lú Olo, hodi ko’alia kona-ba relasaun bilaterál entre Timor-Leste (TL) no Nasaun Cuba.
“Ha’u senti onra boot bele hasoru malu ho Prezidente Repúblika hodi ko’alia kona-ba relasaun bilaterál entre Cuba no Timor-Leste oinsá atu hametin liu-tan kooperasaun ba futuru,” Marcelino ba jornalista sira iha Palásiu Prezidente Nicolau Lobato, Bairru Pité, sesta ne’e, hafoin hala’o soru-mutu ho Xefe Estadu Lú Olo.
Nia hatutan katak Cuba sei hametin relasaun polítika altu nível iha kontestu entre ofisiais importante husi nasaun rua tanba ne’e mak agora vizita mai Timor-Leste hodi identifika oinsá kontinua serbisu ne’e.
Marcelino hato’o nia agradesimentu ba Prezidente Repúblika, tanba Governu no povu Timor-Leste hatudu ona ninian ospitalidade ba Nasaun Cuba.
Nia haklaken relasaun entre Cuba no Timor-Leste harii hosi fiar no valór sai metin liu ne’ebé la’o tiha ona durante tinan barak nia laran, ne’e duni, nia optimista katak relasaun entre Timor-Leste ho Cuba sei hala’o iha ambiente di’ak liu no sei kontinua metin ba beibeik.
Jornalista: Xisto Freitas
Editór : Manuel Pinto
