Diretór Water Aid Timor-Leste, Justinho da Silva, ko’alia ba jornalista sira hafoin ramata hala’o enkontru ho Prezidente Repúblika, Francisco Guterres Lú Olo.

DILI (TATOLI)—ONG nasionál sira hanesan Yayasan Hak, Water Aid no sira seluk tan ne’ebé toma konta ba área bee, saneamentu no hijiene, hala’o enkontru ho Prezidente Repúblika, Francisco Guterres Lú Olo, hodi ko’alia kona-ba bee, saneamentu no hijiene iha Timor-Leste.

Diretór Water Aid Timor-Leste, Justinho da Silva hateten, nu’udar organizasaun sosiedade sivíl, importante loos atu haforsa relasaun ho prezidénsia liu-liu atu rona hanoin, motivasaun no korajen hosi Prezidente Repúblika atu kontinua serbisu iha área bee, saneamentu no hijiene iha Timor-Leste.

Nia esplika, kna’ar importante ida hosi Prezidente maka kona-ba promulgasaun orsamentu jerál Estadu (OJE) no, hanesan ONG, hanoin katak importante loos iha investimentu atu prezidente bele koopera ho Governu no fó hanoin ba Parlamentu Nasionál nomós Governu para bele hasa’e investimentu liu-liu iha parte bee, saneamentu no hijiene tanba ida ne’e ligadu ho nesesidade báziku ba povu nia moris.

“Planu Estratéjiku Dezenvolvimentu Nasionál hateten dentru tinan 2030 (sura hosi tinan 2010), ema hotu iha Timor-Leste asesu ona ba bee, saneamentu no hijiene, entaun ami estuda katak prosesu ne’e hela de’it tinan 12 tan ne’e presiza aselera. Aselera ne’e maka tenke ho investimentu orsamentu,” Justinho ba jornalista sira iha iha Palásiu Prezidente Nicolau Lobato, Bairru Pité, kuarta ne’e, hafoin hala’o enkontru ho Xefe Estadu Lú Olo.

 “Ami uza estatístika sensus tinan 2015 nian katak antijimentu iha parte bee nian purvolta %75 no atinjimentu iha área saneamentu nian purvolta %57. Se ami halo komparasaun oituan kona-ba sensus 2010 no sensus 2015, mudansa hosi tinan 2010 mai to’o iha tinan 2015 ne’e atinji kuaze purvolta %6. Se tinan lima mudansa %6, signifika atinji de’it  %12-%13 dentru tinan 12 ne’ebé sei falta (sura hosi 2010-2030). Tanba ne’e, se ita la hasa’e investimentu iha área bee, saneamentu no hijiene, ita labele atinji ema hotu-hotu atinji ba bee, saneamentu no hijiene iha tinan 2030,” nia hatutan.

Nia haktuir, agora dadaun iha área urbana mosu problema oi-oin kona-ba fornesementu no kualidade bee, depois iha área rurál presiza investimentu kona-ba operasaun no manutensaun sistema bee.

Entretantu, nia esklarese, Prezidente Repúblika apár ho sosiedade sivíl nia hanoin, katak, Xefe Estadu mós fó prioridade maka’as ba nesesidade báziku hanesan edukasaun, saúde, agrikultura nomós asesu ba bee, saneamentu no hijiene.

Jornalista: Xisto Freitas

Editór : Manuel Pinto

HAKEREK NO HATÁN

Please enter your comment!
Please enter your name here