Xefe Estadu Maior Jenerál FALINTIL-Forsa Defeza Timor-Leste (F-FDTL), Lere Anan Timur. Imajen António Goncalves

DILI (TATOLI)—Xefe Estadu Maiór Jenerál FALINTIL-Forsa Defeza Timor-Leste (F-FDTL), Lere Anan Timur, hateten situasaun rai laran hakmatek hela maibé iha indisius artes marsiais hahú ativa fila fali iha nível nasionál.

Nia haktuir, iha parte leste liu-liu Baucau, kuaze fatin barak asaltu malu, iha Hera (Dili) oho malu nomós iha Munisípiu Liquiça.

“Tanba ne’e, ami agora reforsa ona seguransa liu-liu ba finadu ninian.  Polísia no Forsa Armada iha koordenasaun halo oinsá para atu asegura situasaun finadu,” Lere ba jornalista sira iha Palásiu Prezidente Nicolau Lobato, Bairru Pité, Dili, kuarta ne’e, hafoin soru-mutu ho Prezidente Repúblika, Francisco Guterres Lú Olo, kona-ba situasaun seguransa rai laran.

Nia afirma, asaun ne’ebé artes marsiais halo lemo-lemo iha Timor laran nu’udar asaun ida ne’ebé só para halo rai ne’e la hakmatek, ne’e duni, apela ba juventude atu lori artes marsiais hanesan desportu ida nune’e aban bainrua bele kompete ba nasaun seluk.

 “Ita ko’alia kona-ba violasaun direitus umanus, maibé imi (artes marsiais) maka viola ema nia direitus umanus. Maibé kuandu polísia kaptura imi, ne’e viola ema ida de’it nia direitu, la’ós ema barak nia direitu. Ha’u husu dalan ida tan ba ha’u nia oan no ha’u nia alin artes marsiais di’ak liu hadomi o nia rain hodi kria estabilidade para bele hetan dezenvolvimentu. Ita lalika sadik Estadu. Estadu ne’e Estadu ona,” Majór Jenerál ne’e tenik.

Jornalista: Xisto Freitas

Editór : Manuel Pinto

HAKEREK NO HATÁN

Please enter your comment!
Please enter your name here