Primeiru-Ministru, Taur Matan Ruak, lidera enkontru Konsellu Ministru, kuarta, (21/9). Imajen António Goncalves

DILI (TATOLI) – Governu liuhosi reuniaun Konsellu Ministru (KM) halo Rezolusaun Governu hodi fó kontribuisaun fundu $250.000 ba United Nations Convention on Law of the Sea (UNCLOS)

“Konsellu  Ministru halo rezolusaun importante ida, atu kontribui rihun atus rua lima nulu dolar amerikanu, ba kriasaun fundu ida hodi apoiu rai ki’ik no fraku sira ne’ebé iha mós sira nia asuntu konaba delimitasaun fronteira Marítima iha UNCLOS nia okos”, tenik Ministru Estadu Prezidénsia Konsellu  Ministru, Agio Pereira ba jornalista sira hafoin reuniaun KM iha Palásiu Governu, ohin.

Nia hatutan, kontribuisaun fundu ne’e la’ós Timor-Leste de’it, maibé tau osan ne’e para rai seluk mós bele tau iha fundu ne’e hodi tulun prosesu ne’ebé hanesan Timor-Leste .

Aleinde ida ne’e, konsellu ministru mós ko’alia mós konaba Suai Extreme ne’ebé hanesan programa boot, Ministériu Obras Públika (MOP).

“Ohin Konsellu  Ministru hatán katak loron 17 Novembru atu halo inaugurasaun ba auto estrada Suai to’o Zumalai ne’ebé finaliza ona”, nia esplika.

Konsellu Ministru mós aloka osan $180.000 ba partisipasaun veteranu iha rai laran no rai li’ur hodi partisipa iha prosesu dezenvolvimentu iha kosta súl no nasionál.

Importante mós iha reuniaun konsellu ministru rona mós informasaun husi Diretór Jerál Turizmu, José Quintas konaba espozisaun Dubai hanesan espozisaun mundiál iha tinan 2020, ne’ebé kada tinan lima mak akontese no Timor-Leste sempre partisipa.

Jornalista: Julia Chatarina

Editór : Manuel Pinto

HAKEREK NO HATÁN

Please enter your comment!
Please enter your name here