Konsileiru Konsellu Imprensa (KI) ba asuntu Dezenvolvimentu Mídia, Hugo Fernandes

DILI, (TATOLI) – Membru Konsellu Assesoria Internasionál (KAI) ba Sentru Nasionál Chega! (CNC-sigla portugés) nain sia iha rai liur ne’ebé ho koñesementu no esperiénsia oin-oin sei tulun internasionaliza instituisaun ne’e.

Ohin Primeiru-Ministru (PM) disponível atu hasoru malu membru Konsellu Assesoria Internasionál (KAI) sentru nasionál Chega, iha membru KAI nain sia tinan ne’e, primeira-vez sira mai vizita Timor atu ko’alia oinsá mak bele internasionaliza Chega!”, tenik Diretór Ezekutivu CNC, Hugo Maria Fernandes, ba jornalista sira iha Palásiu Governu, ohin. 

Hugo Fernandes hatutan sorumutu ne’e ko’alia ida-idak nia matenek, atu oinsá kontribui ba CNC. “Sira ida-idak iha péritu, Primeiru-Ministru mós husu atu sira kontinua fó assesoria ba Primeiru-Ministru kona-ba asuntu ne’ebé mak sira iha”, katak.

Membru hirak ne’e mai husi área importante ne’ebé governu presiza haree ba oin hanesan,  profes’or istória, arkevista, péritu iha justisa tranzisionál, relasaun esterna, no seluk tan.

Nune’e, nia haktuir Xefe Governu agradese sira nia disponibilidade atu sai parte husi CNC nia servisu no dezeju nafatin bele kontinua fó apoiu ba Timor-Leste, nu’udar ema ne’ebé mak antes ne’e servisu ona ba Timor.

“Primeira-Ministru espera ho sira nia tulun, Sentru Nasionál Chega nomós Governu Timor bele kontinua fó lisaun sira ne’ebé mak di’ak ba mundu”, dehan.

Membru  KAI hanesan membru onoráriu, la’os membru assesoria ne’ebé mak permanente. “Sira nu’dar asesór, sira fó asesoria ba Primeiru-Ministru iha asuntu oin-oin ne’ebé mak liga ho ita nia passadu no projeta ba ita nia futuru ne’ebé mak di’ak liu”.

“Agora oinsá mak ita prezerva ita nia istória atu sai lisaun di’ak, ho sira nia péritu bele tulun, sai lisaun di’ak ba futuru nian”, katak

Diretór mós haktuir tan enkontru ne’e PM hato’o preokupasaun, liu-liu konaba espíritu ne’ebé mak lakon ba luta, la kontribui nafatin no espíritu ne’e la lori ba futuru.

“Entaun oinsá mak kontinua hamoris espíritu ne’ebé mak ita aprende husi pasadu atu bele sai espíritu ida ba dezenvolvimentu”, katak tan.

Entretantu membru KAI nain sira ne’e, eis PM, Rui Maria de Araújo, nomea iha fulan-jullu 2017, hafoin sira mai halo vizita ofisiál dahuluk iha outubru 2018 durante loron lima, hahú 28 outubru to’o 1 novembru 2018.

Membru hirak ne’e sei ajuda CNC iha dezenvolvimentu institusionál nu’udar instituisaun direitu umanu ida atu alkansa rezultadu ne’ebé estabelese ona iha Planu Estratéjiku (2018-2022), nune’e mós sei ajuda instituisaun ne’e iha prosesu internasionaliza relatóriu Komisaun Amizade Lia-loos no Rekonsiliasaun (CAVR-sigla portugés) no Komisaun Lia-loos no Amizade (CVA-sigla portugés).

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here