Sekretáriu Estadu Merício Juvinal dos Reis Akara Foto: Egas Cristovão.

DILI, (TATOLI) – Sekretáriu Estadu Komunikasaun Sosiál (SEKOMS), Merício Juvenal dos Reis Akara, propoin verba ho montante milliaun $5.6 iha Orsamentu Jerál Estadu (OJE) 2019.

Iha aprejentasaun ba Komité Revizaun Orsamentu Polítika (KROP), aprova mós proposta adisionál, nune’e orsamentu ba instituisaun ne’e hamutuk milliaun $5,6. Tanba, antes ne’e tetu fiskál husi Ministériu Finansa (MF) ba SEKOMS prevee ona milliaun $3,82.

“Ohin ami mai aprezenta proposta orsamentu 2019, tuir tetu fiskál ne’ebé mak ami simu milliaun $3,82 ba SEKOMS, maibé ami halo ezersísiu no ajustamentu bazea ba nesesidade, liu-liu RTTL no buat ne’ebé mak ita komunika ona kona-ba oinsá informasaun sira bele to’o rurál, kolaborasaun ho mídia privadu sira ba oin no seluk tan, entaun ami husu adisionál no ami justifika ami nia razaun sira”, esplika Akara ba jornalista sira iha edifísiu ministériu finansa, ohin.

Nia hatutan tan: “Iha konteksu ne’e mak Komité Revizaun Orsamentu ohin indika ona katak ami nia proposta adisionál ne’e passa, tanba ne’e totál agora milliaun $5,6 ba tinan 2019”.

Nia dehan adisionál inklui ba ajénsia Tatoli ne’ebé mak prevee $900.000 resin, para hahú servisu hanesan institutu públiku, atu hamrik mesak hahú tinan oin. “Agora sira bele iha orsamentu rasik hodi bele jere”.

Nia mós dehan tan ba RTTL ne’ebé hanesan rádiu no televizaun Estadu nian, presiza apoiu no fó subsídiu atu moderniza sistema, bele hahú maksimiza programa, hodi ba oin bele atrai ema nia interesse no bele mós simu ema nia apoia.

“Espera ba oin sai forte liután no bele hamrik mesak sai empreza públiku ne’ebé mak bele fó rendimentu di’ak ba Estadu”, dehan tan.

Nune’e mós governante ne’e akresenta orsamentu ne’e inklui kapasitasaun ba jornalista sira, saida mak durante ne’e ko’alia ona mantein apoiu, mídia privadu sira sei hetan atensaun, apoiu Konsellu Imprensa, Rádiu Komunidade, liu-liu RTTL, ajénsia Tatoli, atividade Diresaun Nasionál no Desiminasaun Informasaun no seluk tan.

“Ita koko kanaliza informasaun sira ba kraik no fasilita informasaun husi kraik mai nasionál”,  katak.

Hodi haktuir, Primeiru-Ministru, apresia ho aprezentasaun ohin, nune’e parte SEKOMS mós kontente governu mós apoia mesmu iha buat balun ne’ebé mak presiza tenke hadi’a.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here