Asaun pasifika MUTL. Foto Tatoli/Antonio Goncalves

DILI, (TATOLI)-Movimentu Universitáriu Timor-Leste (MUTL) ho membru liu 300 resin ho kaixaun no lilin nomós ho spanduk ezije ba Parlamentu-Nasionál (PN) atu hapara sosa karreta ho marka Prado, nune’e mós husu atu Prado sira ne’ebé mak iha membru PN sira antes ne’e, ne’ebé seidauk entrega atu entrega fali, tan konsidera katak povu sei moris iha terus no ki’ak.

Iha spanduk sira ne’e MUTL hakerek: PNTL presiza kareta, ospitál presiza ambulánsia, hapara kareta foun no fila kareta Prado.

Reprezentante povu iha uma fukun Parlamentu iha dever obrigatóriu atu rona aspirasaun povu, favór uza kareta tuan, hapara sosa kareta foun.

Ami la kontente ho lideransa nia desizaun hola kareta foun ba deputadu V lejislatura no leilaun patrimóniu estadu; poder ami povu nian, membru PN tenke hasai rezolusaun atu dada hikas Prado; labele sosa Pajero, povu sei mukit nomós selseluk tan.

Portavóz MUTL, Abílio Soares Ximenes haktuir katak iha tinan kotuk liubá ezije ona ba PN terseira lejislatura atu labele halo leilaun iha PN nomós prosesu ne’e kontinua la’o to’o ikus mai PN hakarak kontinua hola fila fali kareta Prado foun.

“Tanba ne’e mak ami halo demonstrasaun para kareta foun mós labele hola, kareta tuan; terseira lejislatura nian mós entrega fila fali,” hateten Portavóz MUTL, Abílio Soares Ximenes ba jornalista sira iha Kampus Resende, Universidade Nasionál Timor Lorosa’e (UNTL), ohin.

Hatan pergunta jornalista kona-ba se PN kontinua hola tanba orsamentu ba hola kareta ba membru PN sira prevé  ona iha orsamentu privative Parlamentu 2019 ho milaun ida resin ne’e, portavóz MUTL haktuir sira marka enkontru ho prezidente PN, Arão Noe kona-ba dada hikas Prado husi membru PN terseira lejislatura, prosesu la’o, maibé ikus mai tuir portavóz ne’e PN la koopera ho sira.

“Prezidente Parlamentu rasik, sira la iha commitment hodi buka solusaun. Tanba ne’e mak ohin ami demo,” informa portavóz MUTL, Abílio Soares Ximenes perante profisionál komunikasaun sosiál sira husi órgaun komunikasaun sosiál oioin.

Portavóz MUTL, Abílio Soares Ximenes hateten, ba oin mak nafatin la hetan solusaun ba sira-nia ejizénsia mak sei organiza demonstrasaun ne’e ho envolve mós organizasaun oioin inklui fó mós karta konvite ba prezidente Munisípiu 13 hodi mobiliza masa atu kontinua ezije to’o hetan solusaun.

“Ami sei apela iha tempu badak nia laran para atu husu apoiu públiku tomak, liliu inan-aman sira, organizasaun hothotu, organizasaun iha Timor laran tomak para apoiu ami hodi bele ezije sira,” friza portavóz MUTL.

Nia hatutan: “Tanba, tuir konseitu demokrasia maioria tenke tuir minoria nia hakarak. Sira na’in 65 (deputadu PN), povu Timor laran barak. Tanba ida ne’e mak to’o novembru nia laran, sira lakohi buka solusaun mak ami sei husu ba públiku tomak para bele apoia. Ami sei fó karta ba prezidente munisípiu sira para sira bele mobiliza”.

Tuir observasaun Ajénsia TATOLI, durante demostrasaun MUTL asegura husi PNTL (Polísia Nasionál Timor Lorosa’e). Ba jornalista sira, Ofisiál Treinadór Munisípiu Díli, Sarjentu Polísia, Marçal Ali Metan hateten katak demonstrasaun tenke distánsia metru 100 hus edifísiu públiku.

“Tanba ne’e mak ha’u tenta ko’alia ho sira para halo karik ba fatin Ekonomia (kampus-red), bele to’o kalan, ami pronto tau seguransa ba sira,” dehan Ofisiál Treinadór, Marçal Ali Metan.

Ofisiál Marçal Ali Metan hateten, buat hotu tenke tuir lei no tuir despaxu komandu nian MUTL nia konsentrasaun hodi halo demo mak iha Kampus Resende, UNTL tanba distánsia metru 100, tanba ba ne’ebé de’it iha mídia atu bele transmite ideia sira.

“Intelektuál mak halo (demostrasaun-red) ne’e tenke sai nu’udar intelektuál, labele sai fali hanesan uluk, 1999 ba kotuk. Uluk ita kontra Bapak, agora ita kontra sé? Ami prontu tau seguransa. Ida ne’e mak ha’u nu’udar komandante polísia ha’u hateten ba sira (MUTL) tuir lei,” insiste Ofisiál Treinadór Munisípiu Díli, Sarjentu Polísia, Marçal Ali Metan.

Antes ne’e, portavóz MUTL Abílio Soares Ximenes deklara katak demostrasaun ne’e hahú ohin no to’o 12 Novembru.

Entretantu, MUTL, iha Kinta (17/08/2017) “Hotar” membru parlamentu sira tan de’it deputadu/a sira hamosu rezolusaun hodi leilaun kareta xapa matrikula mean MP ne’ebé Parlamentu Nasionál sosa ho osan povu nian hodi fó ba deputadu sira.

MUTL sente la justu ho desizaun III lejislatura tanba kareta marka Prado ne’ebé antes ne’e sosa ho osan folin dolár amerikanu 63.000 kada unidade ida multiplika ba 65 (it abele sura rasik) uza iha tinan lima nia laran ho manutensaun rotina ho osan povu nian iha tinan lima deside leilaun ho osan folin baratu osan 8.000.

Nune’e mós, antes ne’e, Movimentu Universitáriu Timor-Leste (MUTL) hato’o petisaun ba Parlamentu Nasionál (PN), Prezidente Repúblika (PR) no Tribunál Rekursu (TR) hodi haree konstitusionalidade no hasai rezolusaun halo kanselamentu ba polítika leilaun kareta Prado ba deputadu PN.

MUTL konsidera leilaun Prado ne’e la tuir prosedimentu sira ne’ebé prevé ona iha dekretu lei 32/2011 kona-ba Jestaun no Alineasaun ba Património Movel sira estadu nian.

Portavoz MUTL, Miguel Arcanjo Moniz da Silva afirma, iha Kampus Sentrál, UNTL (Universidade Nacional Timor Lorosa’e), ohin katak MUTL rejeita totalmente desizaun ida ne’e tan konsidera katak membru PN sira tau aas liu interese pesoál duke komun nomós lamenta ho rezolusaun PN.

Tanba ne’e, portavoz MUTL ne’e liuhusi petisaun ezije ba PN atu kansela rezolusaun ne’e, atu membru PN foun bele utiliza nafatin kareta sira ne’e tanba konsidera katak kareta hirak ne’e kuaze sei iha kondisaun di’ak.

Husu património estadu labele ba fó ba individu atu privatiza karik kareta deputadu sei iha kondisaun di’ak atu utiliza.

Husu atu para/labele hola kareta foun ba deputadu foun tanba sei implika ba orsamentu jerál estadu no oportunidade ba moris di’ak povu Timor-Leste.

Husu diretór nasionál aprovizionamentu atu pendente lai prosesu tenderizasaun ba kareta foun, hodi hein rezolusaun di’ak no neutru ba preokupasaun povu nian.

Husu ba autoridade relevante hanesan CAC (Comissão Anti Corrupção), PDHJ (Provedória dos Direitos Humanos e Justiça) no TdC (tribunal de Contas) atu loke investigasaun kle’an ba aktu deputadu sira-nia desizaun tanba konsidera nakonu ho konflitu interese no manipulasaun.

MUTL, liuhusi nia portavóz Miguel Arcanjo Moniz da Silva fó mós alternativa nu’udar kontribuisaun, kestaun ne’e ho alternativa katak kareta membru PN nian ne’e entrega fali ba deputadu foun sira atu uza ba halo servisu nu’udar deputadu iha mandatu foun.

Tanba, bankada boot sira deputadu tuan sira sei kontinua hela iha uma fukun PN katak la presiza hola tan kareta foun barak ba deputadu foun sira.

Husu atu membru PN ba dahaat nian hodi kria kritéria ba leilaun património estadu ho sériu no rigorozu liutan nomós bainhira nafatin ho rezolusaun ne’e, husu membru PN sira atu prosesa leilaun ba públiku ho montante US$. 15.000,00.

Notísia relevante sira; http://www.tatoli.tl/2017/08/leilaun-prado-mutl-hotar-deputadu/

http://www.tatoli.tl/2017/10/mutl-hatoo-karta-petisaun-ba-pn/

http://www.tatoli.tl/2018/10/la-konkorda-ho-pn-aban-mutl-halo-demonstrasaun/

Jornalista: Rafy Belo

Editór : Manuel Pinto

HAKEREK NO HATÁN

Please enter your comment!
Please enter your name here