Ministru Reforma Lejislativa no Asuntu Parlamentár ,Fidelis Leite Magalhães

DILI, (TATOLI) – Ministériu Reforma Lejislativa no Asuntu Parlamentár (MRLAP) aprezenta ona planu Orsamentu Jerál Estadu (OJE) 2019 ho montante $1.142.371,00 no adisisionál $750.000,00, iha audiénsia Komisaun Revizaun Orsamentu kona-ba proposta no prioridade sira ne’ebé atu hetán finansia husi OJE 2019 iha área ne’ebé tutela.

“Proposta ne’e ho montante $1.142.371,00 no adisionál $750.000,00, inklui finansiamentu ba reforma tolu ne’ebé mak sai hanesan prioridade ida ba Governu; Reforma Lejislativa, Judisiária no Inovasaun Administrativa”, aprezenta Ministru Fidelis Magalhães, iha Ministériu Finansa, Aitarak Laran, ohin.

“Ne’e inklui mós dezenvolvimentu ba programa ne’ebé hamutuk ho Timor-Leste nian no ajénsia Millenium Challenge Corporation (MCC), Estadu Unidu nian hodi promove kondisaun sira ba kriasaun empregu iha tempu badak no naruk”.

Hafoin aprezentasaun, Primeiru-Ministru, Taur Matan Ruak, manifesta konkordánsia ba prioridade ne’ebé aprezenta hodi afirma objetivu mak atu muda situasaun atuál ne’e, tanba investimentu ne’ebé fó fila fali ba Nasaun.

Ministru Fidelis Magalhães mós hatan ba pergunta husi Sekretária Estadu Igualdade ba Jéneru ne’e mós prioridade ida ba MRLAP, ne’ebé sei iha programa hothotu sei dezenvolve husi ministériu ne’e.

MRLAP fó hanoin mós katak tuir akordu ne’ebé asina entre governu Timor-Leste no MCC, organizasaun ida ne’e sei reembolsa Tezouro Timor-Leste nian hosi finansiamentu ne’e, ne’ebé oras ne’e inklui ona iha OJE 2019.

Aprezentasaun planu ba Komité Revizaun OJE 2019 ne’e lidera husi Primeiru Ministru, Taur Matan Ruak.

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here