Membru Konsellu Superiór Ministériu Públiku, Sergio Hornai, kaer liman ho Prezidente Repúblika, Francisco Guterres Lú Olo, molok hala’o enkontru. Imajen Mídia PR

DILI (TATOLI)—Membru Konsellu Superiór Ministériu Públiku (MP) ne’ebé nomea hosi Prezidente Repúblika, Sergio Hornai, hala’o enkontru ho Prezidente Repúblika, Francisco Guterres Lú Olo, hodi relata ba Xefe Estadu kona-ba serbisu saida maka membru Konsellu Superiór Ministériu Públiku halo tiha ona hamutuk ho Prokuradór Jerál Repúblika.

“Ha’u aborda ho Prezidente Repúblika ba situasaun ida ne’e (serbisu Konsellu Superiór MP),” Hornai ba jornalista sira iha Palásiu Prezidente Nicolau Lobato, Bairru Pité, kuarta semana ne’e, hafoin hala’o enkontru ho Xefe Estadu Lú Olo.

Nia esplika katak nia fó enfase liu-ba serbisu inspetoria no dinamizasaun serbisu Konsellu Superiór ninian nomós artikula ba preokupasaun sira ne’ebé maka sai hanesan importante iha Estadu ida ne’e ninian, liu-liu ba prosesu sira ne’ebé maka la’o hela iha nasaun ida ne’e.

Kona-ba nomeasaun ba adjuntu Prokuradór Jerál Repúblika, nia hatán, Prezidente Repúblika iha kompeténsia propriu atu desidi no Prezidente dekreta tiha ona.

“Komisaun propoin ema na’in tolu maibé iha ida maka Prezidente Repúblika halo nomeasaun ona,” Eis Defensór Públiku haklaken.

Nia hatutan katak Konsellu propoin kandidatu hirak ne’e tanba kandidatu hirak ne’e admisível, signifika, Komisaun reuni kondisaun hotu-hotu hodi halo sub-misaun mai iha Prezidente Repúblika atu halo nomeasaun.

Jornalista: Xisto Freitas

Editór : Manuel Pinto

HAKEREK NO HATÁN

Please enter your comment!
Please enter your name here