MUTL halo asaun pasifika hasoru Parlamentu Nasional kona-ba Leilaun Kareta Prado, asaun ne'e iha Kampus Sentral Universidade Nasional Timor Lorosa'e (UNTL) ohin.

DILI,(TATOLI) – Movimentu Universitáriu Timor-Leste (MUTL), tuir planu, aban (Sesta) sei organiza demonstrasaun hasoru Parlamentu Nasionál (PN) tanba PN tuir MUTL nia haree la konsege hapara leilaun karreta Prado PN nian, maibé hetok tau tan osan hodi hola tan karreta iha tinan ida ne’e.

 Porta-vóz MUTL, Abílio Soares Ximenes, informa manifestasaun sei akontese, aban, hodi hasoru Parlamentu Nasionál (PN), tanba uluk haruka hapara ona leilaun ba karreta Prado no lori hikas veíkulu hirak ne’e mai parlamentu, maibé to’o agora seidauk iha rezultadu, enkuantu parlamentu sei kontinua nafatin hola karreta foun ba deputadu foun ho totál veíkulu hamutuk 48, orsamentu ba karreta ne’e prevee ona iha orsamentu privativa parlamentu 2019 nian ho millaun ida resin.

“Asaun ne’ebé ami atu halo ho razaun, parlamentu seidauk rekolla karreta Prado ne’ebé uluk deputadu terseira lejizlatura uza. Karreta hirak ne’e tenke lori fila mai atu bele fasilita tan deputadu foun sira iha lejizlatura da-lima, enkuantu karreta sira seluk ladauk rekolla hotu, maibé hakarak hola tan karreta foun, ida ne’e ami la simu,” Porta-vóz MUTL, Abílio Soares ba jornalista sira iha Kampus Sentrál, Universidade Nasionál Timor-Leste (UNTL), ohin.

Nia informa asaun ne’e organiza hosi MUTL no hetan partisipasaun hosi movimentu hothotu hosi munisípiu no suku sira, dentru loron aban, 26 to’o 12 Novembru, maibé bainhira PN la hatán ba manifestante sira nia ezijénsia maka asaun ne’e sei kontinua nafatin to’o hetan solusaun.

Asaun refere sei hetan seguransa hosi autoridade polisiál, bazeia ba karta autorizasaun ne’ebé antes ne’e MUTL submete ona.

Entretantu, MUTL promete katak durante asaun ne’e la’o sira sei garante la iha konfrontasaun durante Manifestasaun realiza iha, Fakuldade Ekonomia nia oin, universidade nasionál Timor-Lorosa’e.

Jornalista : Zezito Silva

Editór : Manuel Pinto

HAKEREK NO HATÁN

Please enter your comment!
Please enter your name here