Xefe Estadu Maior F-FDTL Interinu, Koronél Koliati, kaer liman ho Prezidente Repúblika, Francisco Guterres Lú Olo, hafoin sorumutu ida iha Palásiu Prezidente Nicolau Lobato, Bairru Pité, foin lalais. Imajen Mídia PR

DILI (TATOLI)—Koronél Koliati sei simu tomada pose hodi okupa kargu Xefe Estadu Maior FALINTIL-Forsa Defeza Timor-Leste (F-FDTL) iha Palásiu Prezidente Nicolau Lobato, Bairru Pité, Segunda (29/10).

Informasaun ne’e hato’o hosi Prezidente Repúblika nu’udar Komandante Supremu Forsa Armada, Francisco Guterres Lú Olo, ba jornalista sira iha Sentru Konvensaun Dili, tersa semana ne’e.

Koronél Koliati asumi kargu refere hodi troka antigu Xefe Estadu Maior F-FDTL, Koronél Falur Rate Laek, ne’ebé asumi ona kargu foun hanesan Brigadeiru Jenerál nomós Vise Xefe Estadu Maior Jenerál.

Entretantu, Lú Olo afirma, kona-ba mandatu Xefe Estadu Maior Jenerál F-FDTL, Lere Anan Timur, nia simu ona proposta hosi Governu kona-ba mandatu refere no iha tempu badak nia sei foti desizaun entre extende no ezonera.

Jornalista: Xisto Freitas

Editór : Manuel Pinto

HAKEREK NO HATÁN

Please enter your comment!
Please enter your name here