DILI (TATOLI)—Prezidente Repúblika, Francisco Guterres Lú Olo, hateten Parlamentu Nasionál (PN) iha kompeténsia atu kansela Prezidente Repúblika nia viajen traballu hodi partisipa Forum Bali iha Bali, Indonézia, semana oin mai.
“Laiha buat ida. Ne’e Parlamentu nia kompeténsia. Ha’u lakohi interfere iha Parlamentu nia kompeténsia. Hanesan mós órgaun soberania sira seluk labele interfere ba Prezidente Repúblika nia kompeténsia,” Xefe Estadu ba jornalista sira iha Palásiu Prezidente Nicolau Lobato, Bairru Pité, kuarta ne’e, relasiona ho membru Parlamentu Nasionál kansela Prezidente nia viajen ba Forum Bali ho votus afavor 19 no kontra 31, tersa horsehik.
Nia dehan, deputadu sira maka tenke hanoin katak Prezidente Repúblika nia kna’ar ida maka atu hala’o relasaun externa nian ho rai sira seluk.
“Deputadu sira maka tenke hatene kna’ar ida ne’e hodi bele uza didi’ak sira nia kompeténsia para fó asentimentu ka la fó asentimentu,” Lú Olo tenik.
Kona-ba vizita Vatikanu, Lú Olo hatán, nia hein para deputadu/a sira iha tempu oin mai ho sentidu estadu tetu halo didi’ak molok deside.
“Problema ida seidauk fó tomada pose ne’e problema internu ita-nian, maibé Prezidente Repúblika nia kna’ar ne’e ho rai sira seluk. Ita labele lori fali kestaun ida ne’e hanesan tusan,” Xefe Estadu hatán relasiona PN kansela viajen PR nu’udar kauza hosi la fó tomada pose ba kandidatu membru Governu na’in sia.
Jornalista: Xisto Freitas
Editór : Manuel Pinto
