Prezidente Repúblika, Francisco Guterres Lú Olo, ba jornalista sira hafoin partisipa Konferénsia Jeosiénsia Internasionál ne’ebé organiza hosi Institutu Petróleo no Jeolójia (IPJ) nu’udar uma-nain ba atividade ne’e iha Sentru Konvensaun Dili, tersa, (23/10). Imajen António Goncalves

DILI (TATOLI)—Parlamentu Nasionál (PN) horisehik iha liuhosi plenária deside la autoriza Prezidente Repúblika (PR) ba Bali (Indonézia) ho razaun situasaun polítika Timor-Leste nian, liu-liu kandidatu membru oitavu governu na’in 11 mak seidauk simu pose.

Assentimentu dezlokasaun PR Francisco Guterres Lú Olo ne’e la passa ho votu afavor 19, kontra 31 no abstensaun 0.

“Ami komprende di’ak solidariedade institusionál, tanba ne’e ami deputadu bankada governu hamutuk ho opozisaun (maski opozisaun lubun ida vota kontra), konsege aprova duni Programa no Orsamentu Estadu 2018 ne’ebé VIII Governu lori mai Parlamentu. Ami kestiona mak Na’i Presidente Repúblika ninia solidariedade institusionál ho aktu lakohi fó posse ba membru governu ne’ebé Primeiru-Ministru indijita ona”, haktuir iha komunikadu husi bankada CNRT, ne’ebé tatoli asesu.

Deputadu hosi bankada Governu, kompostu hosi partidu CNRT, PLP, KHUNTO, UDT/FM konsidera dezlokasaun Xefe Estadu importante, maibé sira mós preokupa ho situasaun polítika. Nune’e husu órgaun estadu tenke respeita ida-idak ninia kompeténsia no separasaun poder tuir Konstituisaun RDTL haruka.

“Ami kontinua husu ba Presidente Repúblika atu fó posse ba membru VIII Governu indijitadu, hafoin ami sei autoriza viajen trabalhu Prezidente Repúblika ba rai seluk”, sira promete.

Iha fatin hanesan Deputadu Bankada Fretilín, David Ximenes “Mandati”, liuhosi deklarasaun votu lamenta ho kanselamentu viajen PR ne’ebé PN halo ona ba dala tolu, nune’e nia observa deputadu sira laiha sensibilidade polítika.

“Parlamentu Nasionál kansela Prezidente Repúblika nia viajen atu atende Sekretáriu Jerál ONU nia konvite, hanesan ema Portugés ida ne’ebé iha papél importante tebetebes iha Timor-Leste nia luta ba Ukun Rasik An”, tenik.

Nune’e mós Deputadu Bankada PD, Adriano do Nascimento aumenta, desizaun hodi la autoriza dezlokasaun PR hanesan desizaun polítika ne’ebé ladún diak iha nasaun.

“Ita kria presedent ne’ebé aban bain rua sei lori komplikadu iha polítika iha ita nia nasaun tanba ita impede tan dala ida viajen Prezidente Repúblika”, nia dehan.

Entretantu pedidu dezlokasaun PR tuir mai, iha loron 17 to’o 26 Novembru, via diplomátiku atu responde disponibilidade konvite santidade Papa Francisco, hodi agradese papél igreja katólika halo ba luta libertasaun povu Timor-Leste no konvite husi Sekretáriu Jerál ONU, António Guterres, atu partisipa iha enkontru altu nivel global compact ne’ebé sei realize iha Maroco iha loron 7 to’o 14 Dezembru.

Antes ne’e PN la autoriza dezlokasaun PR ba Portugal hodi hametin lasu amizade entre nasaun rua iha loron 10 to’o 17 Jullu, no vizita Estadus Unidus Amérika (EUA) iha loron 21 Setembru to’o 3 Outubru, ne’ebé hetan konvite husi Sekretáriu Jerál Organizasaun Nasoens Unidas (ONU), António Guterres hodi partisipa iha 73a sesaun Asembleia Jerál ONU nó mós atividade oin-oin husi sesaun ne’e, hanesan Simeira Dame Nelson Mandela no enkontru bilateral oin-oin.

Jornalista: Julia Chatarina

Editór : Manuel Pinto

HAKEREK NO HATÁN

Please enter your comment!
Please enter your name here