Embaixadór Korea Sul, Lee Chen-Bum entrevista ho jornalista sira. Foto TATOLI: António Gonçalves

DILI, (TATOLI)-Governu Korea Sul liuhusi nia embaixada iha Timor-Leste sei apoiu governu Timor-Leste através Sekretáriu Estadu Komunikasaun Sosiál (SEKOMS) hodi produz video inspirativu sira atu bele transmite iha mídia públika no privada sira iha Timor-Leste hodi inspira no motiva timoroan sira.

Embaixadór Korea ba Timor-Leste, Lee Chen-Bum informa katak iha enkontru ho Sekretáriu Estadu, Merício Juvinal dos Reis “Akara” ko’alia kona-ba kooperasaun, apoiu ba Timor-Leste no partilla esperiénsia, inkluzivamente kona-ba esperiénsia, dezenvolvimentu Korea nian ne’ebé mak akontese iha Tinan 50 liubá, oinsá mak sira ultrapasa situasaun difísil.

“Hakarak fahe esperiénsia ida ne’e para oinsa Timor-Leste bele mós foti esperiénsia balun relevante hodi bele dezenvolve Timor-Leste,” hateten Diplomata Koreanu, Lee Chen-Bum, iha ámbitu enkontru ho SEKOMS ba daruak nian, iha gabinete SEKOMS, Palásiu Governu-Díli, ohin.

Sekretáriu Estadu Komunikasaun Sosiál, Merício Juvinal dos Reis “Akara”, iha fatin hanesan, informa ba jornalista sira katak iha enkontru daruak ho embaixadór Korea, Lee Chen-Bum, Korea entrega video ida kona-ba kooperasaun governu Koreanu ho governu Timor-Leste.

“Sira produz video ida, entrega mai SEKOMS i SEKOMS kontente simu ida ne’e. Tuir planu, ita sei disemina liuhusi RTTL ho TV privadu sira tanba ami sei halo agreement (akordu) ida ho sira oinsá SEKOMS ho televizaun sira bele kolabora I oinsa bele disemina programa, istória susesu ne’ebé mak Timor no Korea hetan,” haktuir Sekretáriu Estadu, Merício Akara.

Sekretáriu estadu haktuir, iha biban hanesan, SEKOMS mós entrega sertifikadu apresiasaun ba estajiária koreana ne’ebé hela iha Timor-Leste no produz video sira kona-ba Timor-Leste no Korea.

“Ida ne’e hanesan pasu primeiru atu kontinua kooperasaun ba oin i ohin ami deskute katak ba oin, departamentu audiovizuál SEKOMS nian, sei kontinua produz programa ne’ebé mak inspirativu. Embaixada Korea ohin hatudu vontade, sira sei apoiu, sira sei kolabora atu produz video barak liután,” hateten sekretáriu estadu.

Video inspirativu balun, tuir SEKOMS, hanesan istória susesu ne’ebé mak timoroan sira hetan bainhira serbisu iha Korea Sul, depois dezenvolve ekonomia uma laran nune’e mós kontribui osan ba estadu no ba nasaun.

“Ida ne’e, istória susesu ne’ebé mak ita tenke apresia, timoroan sira-nia kontribuisaun. Tanba ne’e, iha video tuir mai sei produz entre Departamentu Audiovizuál SEKOMS ho Embaixada Korea iha Timor,” dehan sekretáriu estadu.

Sekretáriu Estadu Merício Akara mós informa tan katak SEKOMS sei asina akordu ho televizaun sira hodi fó sai video inspirativu, produz husi SEKOMS, hodi bele enkoraja sidadaun timoroan sira.

“Ita lansa, ita públika video sira mais inspirativu para enkoraja, liliu joven sira, para iha planu vida ida di’ak liu,” konsidera sekretáriu estadu Merício Juvinal dos Reis “Akara”.

Entretantu, iha sorumutu ne’e embaixadór Korea Sul, Lee Chen-Bum entrega mós video ida ho títulu Milagre Korea ba SEKOMS.

Video relevante kona-ba notísia ne’e; https://www.youtube.com/watch?v=Fqd6g1SAlNY&feature=youtu.be

Jornalista: Rafy Belo

Editór : Manuel Pinto

HAKEREK NO HATÁN

Please enter your comment!
Please enter your name here