Foto/Google.

DILI, (TATOLI)-Sentru Lojístika Nasionál (CLN, sigla iha portugés) sei halo intervensaun merkadu liuliu ba foos tonelada hamutuk 1800 iha territóriu tomak iha finál fulan ne’e to’o novembru.

“Munisípiu ida pur volta tonelada 120, signifika besik 42 mil saka. Agora, ami hein hela prosesu orsamentu ne’e se sistema loke ona ami iha ona mina, ami halo kedas ona intervensaun”, Prezidente CLN, Augusto Junior, afirma tersa ne’e iha Bebora.

Intervensaun merkadu ne’ebé halo ne’e ho objetivu maka halo presu foos fila tiha ba normál, tanba iha fatin balun sa’e maka’as.

“Seidauk tan ho ameasa ida agora alerta el-niño mai, kuandu ho ameasa ida ne’e hakarak ka lakohi tama natál presu sei sa’e maka’as, tanba ne’e maka ami halo ona pedidu ida ba ami-nia Ministru Agio Prereira hetan ona aprovasaun, se laiha probelma iha fin fulan ne’e ou inísiu novembru ami sei bá Vietname para hatama tan foos pur volta tonelada rihun 12”, informa.

Sobre importa tan foos ne’e atu haree no sukat tanba alerta el-niño ne’e naruk liu husi fin setembru 2018 to’o juñu 2019 nomós atu tama bá natál no tinan foun.

“Bainhira tama iha natál no tinan foun presu iha Timór sempre sa’e tanba demanda ne’e boot tebes no anu letivu edukasaun ne’e komesa iha janeiru no merenda eskolár presiza foos entaun presiza hatama”.

Aleinde ne’e iha iklima Timór nian iha finál tinan sempre udan boot entaun CLN tenke apoia ba Ministériu Solidariedade Sosiál no Inkluzaun hanesan rezerva ida bainhira dezastre ruma akontese halo kedan atuasaun. Situasaun ida ne’e halo CLN presiza urjentemente hatama foos tonelada 12.000.

CLN halo tiha ona observasaun iha país tomak hatudu rezultadu negativu uitoan katak foos iha munisípiu sira sa’e mas área rurál sa’e maka’as liu to’o dólar 18.

“Tanba ne’e maka hanesan Sentru Lojístika Nasionál, referénsia iha nasaun barak hatudu normalmente sentru lojístiku tenke iha rezerva estoke mínimu 70% husi konsumu nasionál, tanba se ko’alia kona-ba normaliza presu, maibé ita-nia estoke ne’e lasufisiente entaun importadór sira bele halimar presu iha merkadu tanba kalkula ona ita halo intervensaun karik dalaida, rua de’it entaun banhira hanesan ne’e sira hasa’e kedan presu molok ita hatama foos mai folin aas tiha ona. Ida ne’e maka hakarak ka lakohi sentru lojístiku mínimu iha rezerva sufisiente”.

Antes ne’e MTKI halo intervensaun merkadu ho nesesidade bázika sira seluk, maibé hafoin análiza katak populasaun ladún interese ba sasán seluk no foku liu ba foos, entaun sei halo intervensaun ba foos de’it.

Jornalista : Maria Auxiliadora

Editór : Manuel Pinto

HAKEREK NO HATÁN

Please enter your comment!
Please enter your name here