DILI, (TATOLI) – Timor-Leste liuliu Institutu Petróleo no Jeolójia (IPJ) sai uma na’in ba konferénsia internasionál da-haat ho konvidadu péritu nasionál no internasionál mai husi Austrália, Estadu Unidu Amérika (EUA), Inglatera, Indonézia no Portugal hodi partilla koñesimentu no esperiénsia oioin kona-ba jeosiénsia, hahú 23 to’o 28 outubru 2018.

Péritu internasionál sira ne’e mak hanesan Mike Sandifor husi Melbourne University, Timothy Carlton husi University Colege London, Roberto Fainstein husi Universidade de Coimbra, Ronald A. Harris husi Brigham Young University, Nicole Cox husi Federation University Austrália, David Haig husi University of Western Austrália no Asep Karsidi husi Badan Informasi Geoespasial.

Objetivu konferénsia ne’e mak halibur hanoin husi espesialista profesionál sira iha kampu jeolójia nian hodi fornese notísia informative ba fórum akadémia, indústria, ajénsia reguladora no peskizadora sira ba dezafiu informasaun sira kona-ba jeosiénsia iha relasaun ho diversifikasaun ekonómika ne’ebé bele fó impaktu ba dezenvolvimentu ekonómiku iha prazu naruk.

Iha okaziaun ne’e, papel prinsipál husi geólogu sira iha preparasaun dalan ba dezenvolvimentu sustentável no redusaun ki’ak mós sei aprezenta nomós diskute tópiku tékniku importante haat, hanesan governa rekursu jeolójiku ba dezenvolvimentu Timor-Leste-saida mak ita iha no sei prodús, iha ne’ebé? Bainhira no tanbasá?

Dadus peskiza jeolójika no informasaun ba dezenvolvimentu ekonómiku Nasaun nian, sustentabilidade jestaun rekursu jeolójiku no dezenvolvimentu ekonómiku no volatilidade husi rekursu jeolójiku no geo-perigozu.

“Depois loron haat, husu ba povu saida mak sira hatene kona-ba rikusoin, iha péritu lubuk ida sei halo aprezentasaun kona-ba ita-nia rikusoin. Buat ne’ebé ita nota durante ne’e ita simu informasaun notisiáriu, nunka iha informasaun sientífika”, katak prezidente IPJ, Helio Casimiro Guterres, ba jornalista sira iha Sentru Konvensaun Dili, (CCD-sigla portugés), rotunda merkadu antiga, ohin.

Prezidente IPJ ne’e mós hatutan péritu internasionál sira ne’ebé sai mós oradór ba konferénsia internasionál ne’e, sira ne’ebé iha kedas 1972 no antes ne’e sira-nia profesór sira mak halo estudu kona-ba ita-nia rain.

“Sira pioneru ba deskoberta ita-nia rikusoin sira, ne’ebé saida mak sei sai husi ne’e, sei sai atu fó hatene ba povu dehan katak saida mak ita iha, iha ita-nia rikusoin? i saida mak iha, risku ita-nia naturál”, konfirma prezidente Helio Casimiro hodi hatan ba ajénsia TATOLI kona-ba rezultadu saida mak sei espera husi konferénsia internasionál ne’e.

Konferénsia ne’ebé organiza husi IPJ ne’e, ofisialmente loke husi Prezidente Repúblika, Francisco Guterres Lú Olo, inklui reprezentante primeiru-ministru, ministru Hermenegildo Pereira.

Iha abertura ne’e, Xefe Estadu hateten koñesimentu no lala’ok protesaun no dezenvolvimentu ba rekursu jeolójiku no naturál sira sai hanesan komponente ida husi ezersísiu sidadania no no soberania timoroan, no hametin sentidu katak rekursu sira ne’e públiku, pertense ba hothotu no sai nu’udar elementu husi prosesu identifikasaun ho buat hirak ne’ebé hale’u ita.

“Nasaun ida ne’ebé la koñese ninia rekursu minerál sei nunka bele sai nasaun ida ne’ebé kompletamente soberanu”, hateten iha nia diskursu perante audiénsia sira husi entidade oioin.

Prezidente hatutan koñesimentu jeolójiku hanesan fatór soberania ida. “Ema ne’ebé koñese didi’ak ninia teritóriu, iha kapasidade atu demarka no defende teritóriu hasoru sira ne’ebé kaan teritóriu ne’e”.

Kona-ba konferénsia internasionál ne’e, prezidente konsidera relevante tebes no hamosu espetativa ida aas kona-ba ninia rezultadu sira.

“Ho hanoin ida ne’e mak ha’u hakarak hakotu hodi fó parabéns ba Institutu Petróleu no Jeolojia (IPJ) ne’ebé dezde harii iha 2012 hala’o atividade hirak ne’ebé lori duni benefísiu ba ita-nia rain”, kongratula.

Entretantu konferénsia ne’e hala’o kada tinan rua dala ida, alende konvida péritu sira, marka mós prezensa husi akadémiku, diplomátiku, sosiedade sívil nomós entidade relevante sira.

Tema konferénsia internasionál IPJ tinan ne’e mak Dadus Jeolójiku no Informasaun ba Diversifikasaun Ekonómika no Dezenvolvimentu.

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here