Bispu Dioseze Baucau, Don Basílio do Nascimento

DILI, (TATOLI) – Bispu Dioseze Baukau, Don Basílio do Nascimento, hala’o enkontru ho Prezidente Repúblika, Francisco Guterres Lú Olo, hodi ko’alia kona-ba Vatikanu konvida Xefe Estadu atu vizita Roma iha 23 novembru, tinan ne’e.

“Ohin Prezidente Repúblika hakarak husu bispu sira nia opiniaun kona-ba vizita ne’e no aumezmu tempu partilla uitoan ba buat ne’ebé maka Prezidente Repúblika konsidera hanesan iha folin ko’alia ho Santu Padre nu’udar reprezentante Estadu Timor-Leste”, Don Basílio ba jornalista sira iha Palásiu Prezidente Nicolau Lobato, Bairru Pité, tersa ne’e, hafoin enkontru ho Xefe Estadu.

Kona-ba planu Prezidente Repúblika atu konvida Santu Padre vizita Timor-Leste, Bispu hatán, ne’e susar uitoan no buat ne’e bele halo kuandu vizita ba Timor ne’e integra iha programa ida ne’ebé Amu Papa vizita mai nasaun balun iha Ázia ninian.

“Intensaun Prezidente Repúblika nian ne’e atu hato’o konvite ida ba Papa Francisco atu bele mai vizita Timor hanesan nasaun Katóliku proporsionalmente boot liu iha mundu”, nia esplika.

Don Basílio afirma orgaun soberania sira iha nasaun ida ne’e nian hatene ida-idak nia fatin, sé maka reprezenta sé no intervensaun órgaun soberania nian ne’e iha reflexu ida ba liur.

“Ne’e duni, ha’u hanoin katak ita hotu-hotu hatene tetu katak ita la’ós haree de’it ba ita nia dapur laran maibé oinsá maka interese Timor nian ne’e bele reprezenta ho di’ak iha liur liuhusi orgaun soberania hirak ne’e”, dehan Bispu hodi hatán kona-ba tentativu balun atu kansela Xefe Estadu nia viajen traballu ba Roma.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here