Deputada Bankada PLP, Maria Angelina Sarmento Lopes. Imajen/Egas Cristovão

DILI (TATOLI) –Parlamentu Nasionál (PN) prevee ona orsamentu iha planu Orsamentu Jerál Estadu, tinan 2019 nian, atu hola karreta 48 hodi fasilita servisu deputadu sira nian, liu-liu halo fiskalizasaun.

Vice Prezidente Parlamentu Nasionál Maria Angelina Sarmento informa lia ne’e hodi hatán ba ezijénsia Movimentu Universitáriu Timor-Leste (MUTL) ne’ebé kestiona makas atu lejizlatura da-lima labele hola tan karreta foun.

“Ida ne’e difisil, tanba la’ós karreta hothotu iha kondisaun prontu atu ba baze hodi halo fiskalizasaun, tanba ne’e orsamentu privativa parlamentu nian prevee ona atu hola karreta foun ba deputadu foun sira, maibé fazeadamente,” Maria Angelina Sarmento informa ba jornalista iha Parlamentu Nasionál, ohin.

Bazeia ba nesesidade, Parlamentu Nasionál prevee osan ho montante ida resin, iha Orsamentu Estadu 2019 hodi sosa karreta ba uluk deputadu foun sira hamutuk 48, enkuantu 17 karreta ne’e sei mantein nafatin ba deputadu sira ne’ebé re-eleitu.

Hatán ba marka karreta saida mak sei sosa ba deputadu foun sira ne’e, Nia dehan, karreta ho marka pazero sport, maibé ida ne’e mós sei kabe ba tékniku sira atu halo identifikasaun  iha merkadu.

“Posibilidade bele iha marka seluk no marka sira ne’e tenke ho orsamentu ne’ebé ita iha.”

Enkuantu, kinta lejizlatura liuhosi Prezidente Parlamentu Nasionál, Arão Noé halo esforsu atu rezolve karreta hirak ne’ebé ladauk lori fila hosi eis deputadu sira ne’ebé la re-eleitu.

 Jornalista : Zezito Silva

Editór : Manuel Pinto

HAKEREK NO HATÁN

Please enter your comment!
Please enter your name here