Ilustrasaun

DÍLI, (TATOLI)-Formadór no amu ba seminarista semináriu Maloa-Díli, Padre Paulus Maia hateten, joven nia kna’ar iha igreja, iha sosiedade mak “mover”, “transformar”, “renovar” no “viver” ka movimenta, transforma, renova no moris.

Joven hanesan eixu ba movimentasaun ka sentru ba movimentasaun nian, iha ne’ebé movimentasaun hothotu lori mudansa ba sosiedade. Joven ne’e bele sai objetu ba buat di’ak, bele mós sai objetu ba buat la di’ak.

“Movimentasaun di’ak eh aat iha sosiedade ne’e, tanba joven. Nune’e, movimentasaun ne’ebé la’o di’ak, lori buat di’ak; vantajen, benefísiu ba sosiedade, igreja no ba nasaun,” hateten Padre Paulus Maia, bainhira sai oradór subordinadu ho tópiku Papel Joven iha Igreja, iha atividade “Kampus Ministry”, iha Fakuldade Direitu, Kampus Sentrál, Universidade Nasionál Timor Lorosa’e (UNTL), sesta lorokraik (19/10).

Padre Paulus Maia hateten tan katak joven presiza kapasita aan ho eskola, estuda no tuir formasaun sira; formál eh informál basá formasaun ne’e esensiál. Formasaun juventude ne’e inovasaun ba mundu.

“Joven forma ninia aan halo di’ak, forma nia aan halo tasak (maduru), lori mudansa ba mundu, joven hafoun mundu, joven hafoun sosiedade,” dehan padre ne’e.

Formadór no amu ba seminarista, Padre Paulus Maia esplika, joven bainhira halo movimentasaun no movimentasaun ne’e atu sai di’ak, presiza espiritu entuziasmu; labele kolen, labele dukur, labele baruk.

Joven tenke sai inisiativadór, joven tenke sai ema ne’ebé kreativu. Maske iha inisiativu maibé la kreativu, ne’e seidauk kompletu. Inisiativu ho kreatividade bazea ba talentu ne’ebé iha, sei lori buat di’ak.

Ikus liu, joven tenke haksolok, labele sai joven ne’ebé triste. Joven hanesan transformadór; muda husi situasaun ida ba situasaun seluk. Joven tenke sai ida ne’e. Joven sai transformadór; muda hahalok, muda hanoin, muda hakarak, bele lori transformasaun di’ak iha sosiedade

Joven presiza sai renovadór. Transforma de’it seidauk to’o, presiza sai mós renovadór; tanba ne’e joven ne’ebé iha hanoin foun, iha hakarak foun, iha mehi foun, presiza halo foun ba buat ne’ebé antigu tiha ona.

Joven tenke hahú hafoun ninia aan, depois hafoun sosiedade. Tanba ne’e, mudansa la’ós mai husi fatin seluk, la’ós de’it ita tenke estuda. Hakarak muda sosiedade, uluk liu muda ita-nia aan, muda ita-nia hanoin, muda ita-nia hakarak no projeta iha ita-nia hahalok. Se ita bele halo ida ne’e, ita bele muda ema seluk, ita bele muda ema barak, ita bele muda sosiedade.

Ikus liu tan, joven bele sai hanesan movimentadór, bele sai hanesan transformadór, bele sai renovadór, joven rasik mak tenke moris iha ambiente ida ne’e. Se ida ne’e ita bele halo, hafoun buat hothotu iha ita-nia nasaun no ita-nia igreja.

Joven apostolu ba ema seluk; joventude nia papel iha igreja mak ida ne’e. Joven la’ós ba igreja no umanidade nu’udar prezente nian maibé joven sai hanesan prezente ba igreja no umanidade. Joven nia servisu, nia papel iha uma kreda importante tebes.

Joven sai apostolu katak sai sasin ba ema seluk ho dalan la’ós ko’alia de’it kona-ba lia loos, justisa, dame no domin, maibé liu fali ida ne’e mak fó sasin ba moris ho lia loos, justisa, dame no hatene hadomi.

“Infelizmente dalaruma buat sira ne’e hotu difisil atu ita hotu hala’o iha ita-nia moris. Maibé, la signifika imposível. Buat hothotu presiza ho pasu primeiru, pasu primeiru ne’e dalaruma todan, maibé ita atu to’o iha fatin ruma, hakarak ka lae tenke pasu primeiru,” dehan amu Paulus Maia.

Tanba ne’e, tuir amu Paulus, perante akadémiku UNTL sira, difikuldade iha pasu primeiru ne’e presiza hasoru ho entuziasmu, otimista, haksolok no ikus liu mak “senso de responsabilidade”.

Responsabilidade ba ita-nia aan rasik, responsabilidade ba ita-nia maluk sira, responsabilidade ba ita-nia sosiedade. Se ida ne’e ita bele halo ona konserteza, otomatikamente, Jesus Cristo ne’e ita haklaken.

Tanba ne’e, atu to’o iha movimentadór, transformadór, renovadór ne’e, amu Paulos Maia insiste katak ita tenke husik buat hothotu iha ita-nia moris.

“Labele hanoin ita-nia aan de’it, ita-nia espiritu egoizmu ne’e tenke soe. Ita-nia espiritu barukteen tenke soe, ita-nia espiritu ne’ebé la hakarak atu dezenvolve; hanoin hakarak halo destruisaun, ita tenke soe. Ita soe buat hirak ne’e, itabele halo buat foun. Joven hanesan fuan igreja nian, tenke moris nafatin,” tenik padre Paulus Maia.

Entretantu, atividade “Kampus Ministry” ne’e organiza husi Fakuldade Direitu UNTL ho tópiku família no subtópiku Haklaken Evanjellu iha Mundu Joven nian Liuhusi Sasin Moris Lorloron.

Oradór iha atividade ne’e, alende Formadór no amu ba seminarista semináriu Maloa-Díli, padre Paulus Maia, inklui mós Psikólogu timoroan, Alberto Piedade nomós Eis-primeira dama, Isabel da Costa Fereira.

Jornalista: Rafy Belo

Editór : Manuel Pinto

HAKEREK NO HATÁN

Please enter your comment!
Please enter your name here