Sekretáriu Estadu Komunikasaun Sosiál, Merício Juvenal dos Reis Akara, dada-lia ho Sekretáriu Estadu Polítika Formasaun Profisionál no Empregu, Julião da Silva. Dokumentasaun Tatoli

DILI, (TATOLI) –  Sekretáriu Estadu Polítika Formasaun Profisionál no Empregu (SEPFOPE), Julião da Silva, halo vizita kortezia ba Sekretariu Estadu Komunikasaun Sosiál (SEKOMS), Merício Juvenal dos Reis Akara, hodi ko’alia kona-ba oinsá utiliza mídia ho másimu hodi públika atividade governu.

“Hafoin simu posse, sekretáriu estadu komunikasaun sosiál mai vizita ona ha’u, no ohin ha’u mai halo vizita kortezia ida. Iha enkontru ne’e ami ko’alia kona-ba oinsá asegura servisu komunikasaun sosiál ba mídia no atu utiliza ho másimu iha ministériu hotu”, tenik ba jornalista sira iha Palásiu Governu, ohin.

Nia hatutan enkontru ne’e nia parte mós atualiza uitoan oinsá SEPFOPE ninia servisu, liu-liu uza mídia durante ne’e para bele públika servisu kona-ba atividade no programa governu sira ne’ebé halo iha baze durante ne’e, nune’e mos hadi’a sistema informasaun ne’e di’ak liu atu povu sira bele asesu.

“Ohin mós ko’alia oinsá mak pájina ofisiál SEPFOPE bele liga ho portál governu, no ami sei informa ba ami nia pontu fokál mídia sira atu bele mai liga ho portál governu”, katak.

Governante ne’e mós dehan tenke involve mídia sira hotu ba servisu ne’ebé membru governu sira halo, la’os SEPFOPE de’it, ezemplu mak agora dadauk SEPFOPE atu halo rekrutamentu ba seasonal worker ba Austrália, ne’ebé rekrutamentu ne’e la halo iha Dili de’it maibé iha mós munisípiu seluk para joven sira bele hetan oportunidade hanesan.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here