Diretor Nasionál Orsamentu Jerál Estadu, Ministériu Finansa (MF), Salomão Yoaquim. Foto/Egas Cristovão.

DILI, (TATOLI) – Komité revizaun polítika Orsamentu Jerál Estadu (OJE) 2019, konvoka enkontru preparatória ba membru sira, hodi tékniku finansa sira bele fó hanoin ba membru komité molok halo enkontru ho instituisaun Estadu sira iha semana oin.

“Ohin iha enkontru plemináriu ida, atu fó briefing (instrusaun) ba membru komité revizaun polítika Orsamentu Jerál Estadu 2019 molok semana oin tama enkontru komité revizaun polítika orsamentu ho instituisaun Estadu sira”, tenik Diretór Nasionál Orsamentu Jerál Estadu, Ministériu Finansa, Salomão Joaquim, ba jornalista sira iha salaun Ministériu Finansa, ohin.

Nia hatutan enkontru ne’e mós informa ba membru komité ne’ebé kompostu husi membru governu balun, kona-ba sekuénsia kalendáriu hodi atende diskusaun ho instituisaun Estadu sira hahú loron 22 to’o 27 outubru.

Nia dehan tan: “Tempu ida ne’e ba fó tékniku sira prepara informasaun no dadus sira ne’ebé relevante ho diskusaun iha pasta verde, nune’e bele utiliza hodi informa ba membru komité sira hodi kaer hanesan referénsia ida para bele halo diskusaun ho liña ministériu sira”.

“Ami mós aprezenta ba membru komité kona-ba mekanizmu informasaun ne’ebé tama iha pasta verde, nu’udar informasaun ida mak membru sira bele kaer, iha tempu hanesan mós bele fasilita sira hodi halo diskusaun ho liña ministériu sira atu determina sira nia orsamentu ba kada ministériu”, katak.

Nune’e ho montante sira hotu ne’ebé kada instituisaun Estadu determina ona iha diskusaun ne’e, bele atualiza iha proposta OJE 2019 ne’ebé tuir ajenda sei aprezenta iha Parlamentu Nasionál (PN) iha loron 8 novembru.

Antes ne’e, iha loron 3 outubru liuhosi reuniaun Konsellu Ministru aprova rezolusaun Governu kona-ba nomeasaun membru Komité Polítiku Revizaun OJE 2019, ho objetivu haree oinsá bele aloka estratejia husi rekursu sira atu atinje kompromisu no objetivu sira ne’ebé hakerek iha dokumentu estratéjiku no kumpri ho rigor ba planu tinan finanseiru 2019, ba elaborasaun proposta OJE.

Komité Polítiku Revizaun OJE 2019 kompostu husi, Prezidente ba Komité mak Primeiru-Ministru, Vise-Prezidente mak Ministra Finansa em ezersísiu, membru sira maka Ministru Estadu Prezidénsia Konsellu Ministru no Ministru Planeamentu no Investimentu Estratéjiku em ezersísiu, Ministru Negósiu Estranjeiru no Kooperasaun, Ministru Obras Públikas, Ministru Agrikultura no Peska.

Observadór ba komité ne’e mak Ministru Reforma Lejislativa no Asuntu Parlamentár no Sekretária Estadu ba Igualdade no Inkluzaun. (

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here