Ministru Defeza (MD), Filomeno da Paixão de Jesus. Foto António Gonçalves

DILI,(TATOLI) – Governu da-ualu liuhosi Ministru Defeza, Filomeno Paixão, sei aranka ba Repúblika Populár Xina hodi partisipa forum internasionál Xiangshan 8th, iha Beijing.

“Ha’u hasoru Primeiru Ministru, no nia autoriza ha’u atu ba Repúblika Populár Xina atu hola parte mós iha forum Xiangshan 8th Beijing, tanba forum ne’e hala’o tinan-tinan”, informa Ministru Defeza, Filomeno Paixão, ba jornalista sira iha Palásiu Governu hafoin hasoru Xefe Governu, Taur Matan Ruak, ohin.

Iha forum Xiangshan 8th Beijing ne’e sei ko’alia kona-ba jeo-polítika, jeo-estratéjia ne’ebé ligadu ba negósiu, petroleum no polítika.

Governu Timor-Leste nia prezensa iha forum, ministru dehan partisipasaun ita nian iha forum ne’e atu rona oinsá Xina, Rusia, Korea Norte no seluk tan ne’ebé bolu bloku orientál atu haree polítika iha rejiaun ne’e la’o oinsá.

“Ita ba hodi hola parte atu rona, nune’e bele hatene katak bloku weste nia hanoin ne’e oinsá no bloku leste nia hanoin ne’e saida kona-ba dezenvolvimentu ázean no pasífiku”, dehan.

Enkuantu, Timor-Leste nia prezensa mós importante liu, tanba Xina mós durante ita nia luta sira fó kontribuisaun, entaun ita mós tenke partisipa iha forum ne’e oinsá atu halo mós análiza situasaun.

Entretantu, Ministru Defeza sei aranka ba Repúblika Populár Xina iha 23 outubru no sei fila hikas mai Timor-Leste iha 30 outubru.

Jornalista: Zezito Silva

Editora: Rita Almeida

HAKEREK NO HATÁN

Please enter your comment!
Please enter your name here