Prezidente Repúblika, Francisco Guterres Lú Olo, entrega prezenti ba Núnsiu Apostóliku, Monseñor Joseph Marino, kinta ne’e, hafoin enkontru ramata. Imajen Mídia PR

DILI (TATOLI)—Núnsiu Apostóliku, Monseñor Joseph Marino, kinta ne’e, iha Palásiu Prezidente Nicolau Lobato, Bairru Pité, hala’o soru-mutu ho Prezidente Repúblika (PR), Francisco Guterres Lú Olo, hodi ko’alia kona-ba vizita Xefe-Estadu ba Roma.

Iha okaziaun ida ne’e, Núnsiu Apostóliku transmiti saudasaun hosi Amu Papa Francisco (Jorge Mario Bergoglio) ba Prezidente Repúblika no povu Timor-Leste no haktuir katak Amu Papa kontinua fó nia atensaun no domin ba povu Timor-Leste.

Monseñor Joseph dehan hosi termu formál no protokolár iha ona kontatu ho Vatikanu atu iha 23 Novembru, Prezidente Repúblika bele vizita Roma, enkuantu, Prezidente Repúblika Lú Olo subliña dala ida tan nia dezeju atu hasoru malu ho Amu Papa Francisco iha Roma.

 “Ita tenke hatene katak vizita ne’e la’ós vizita polítika, ekonómiku, komersiál, estratéjiku no militár, maibé ne’e vizita espirituál no peregrinasaun ida,” Núnsiu Apostóliku afirma no nia hein katak Prezidente Repúblika sei hetan autorizasaun hosi Parlamentu Nasionál atu bele halo vizita ne’e.

Entretantu, Xefe Estadu informa ba Monseñor Joseph Marino katak nia (Prezidente) sei konvida Amu Papa Francisco atu halo vizita ofisiál mai Timor-Leste iha tinan oin hodi komemora tinan 20 referendu ne’ebé timoroan desidi atu ukun rasik-án no tinan 30 vizita Amu Papa João Paulo II ne’ebé Timor-Leste hetan atensaun mundiál no manifestasaun dahuluk hodi protesta okupasaun militár Indonézia.

Monsenhor Joseph Marino hatán katak loron hirak ne’e nu’udar loron isóriku ba Timor-Leste, ema hotu hatene nia importánsia ba Timor-Leste.

Antes ne’e, Núnsiu Apostóliku Joseph Marino hasoru malu tiha ona ho Prezidente-Repúblika, Francisco Guterres Lú Olo hafoin tomada pose iha Maiu 2017.

Jornalista: Xisto Freitas

Editór : Manuel Pinto

HAKEREK NO HATÁN

Please enter your comment!
Please enter your name here