Xefe Estadu Maiór FALINTIL-Forsa Defeza Timor-Leste (F-FDTL), Majór Jenerál Lere Anan Timur

DILI, (TATOLI) – Xefe Estadu Maior Jenerál FALINTIL-Forsa Defeza Timor-Leste (F-FDTL), Lere Anan Timur, hateten iha posibilidade boot sei koloka postu mistu kompostu membru Polísia Nasionál Timor-Leste (PNTL) no F-FDTL iha Postu Administrativu Laga, Munisípiu Baukau.

Objetivu hosi postu mistu ne’e, Lere dehan prevene konflitu entre juventude balun hosi Laga no Laivai (Lospalos), relasiona ho joven ida ho naran Augusto Gama ne’ebé foin lalais mate diskonfia hetan tiru, momentu ne’ebé lori mate isin ofisiál ida F-FDTL hosi Dili ba Laivai.

“Ha’u rona dehan sira hafuhu hela Laivai oan sira ne’ebé liuhusi Laga, ne’e labele. Ha’u nia oan sira iha Laga ne’e hanoin sala. Dalan públiku ne’e livre ba sidadaun atu halo sirkulasaun”, Majór Jenerál ne’e ba jornalista sira iha Palásiu Prezidente Nicolau Lobato, Bairru Pité, kuarta ne’e.

Nia haktuir juventude balun iha Laga diskonfia membru F-FDTL maka oho vítima Augusto Gama iha altura ne’ebá, maibé Lere dehan ne’e Tribunál maka tenke tesi katak membru F-FDTL maka oho ka entre sira maka oho malu.

“Autopsia laiha ne’e agora atu akuza F-FDTL oinsá. Ne’e tenke liuhusi prosesu legál”, nia esklarese no salienta joven ne’ebé mate ne’e la’ós mate iha konflitu nia fatin (besik dalan públiku) maibé mate fali iha área tasi.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here