Imajen hosi google.

DILI, (TATOLI) – Governu tenke kria oportunidade ne’ebé di’ak ba setór públiku no privadu hodi investe iha agrikultura, nune’e haluan mós programa protesaun sosiál ba grupu vulneravél sira, kria oportunidade ba produtór sira hodi asesu ba merkadoria.

Relatóriu Globál Hunger Index 2017 hatudu nivel númeru hamlaha iha Timor-Leste, seriu. Tanba, númeru má nutrisaun kontinua aas, labarik ida hosi nain rua ho idade tinan lima mai kraik sofre raes badak ka badak liu ba sira nia idade, tanba la asesu ba ai-han adekuadu no dalaruma ai-han ne’ebé sira konsumu ladun nutritivu hodi fó kresimentu no dezenvolvimentu ba sira nia kakutak no isin.

Tuir komunikadu ne’ebé TATOLI asesu hosi Organizasaun Saúde Mundiál (OMS) relasiona ho loron mundiál a-han ne’ebé komemora, ohin, (1610), relata empregadór ki’ik sira presiza adapta  métudu foun agrikultura ne’ebé sustentavél hodi aumenta produtividade no rendimentu.

Alende ne’e aprosimasaun ne’ebé konsidera ambiente no aproveita forsa inovasaun teknolojia no kontinua kria oportunidade servisu ne’ebé adekuadu.

Enkuantu, lideransa ne’ebé forte ba planeamentu no programasaun multisetorál hodi tau atensaun ba kauza imediata hosi má nutrisaun, inklui seguransa ai-han, agrikultura sustentavél, bee moos no saneamentu, planeamentu familiár no prátika kuida importante tebes.

Nota ne’e haktuir Nasaun Unida prontu suporta governu hodi promove mudansa ba hahalok pozitivu iha komunidade no asisténsia ne’ebé di’ak hodi kria ambiente hodi fó fatin ba ezisténsia sistema no organizasaun sira hodi hadi’a seguransa ai-han no nutrisaun, suporta koordenasaun no polítika diálogu hodi hetan rejultadu nutrisaun ida ne’ebé di’ak liu.

Nasoen Unida liuhosi nia ajénsia hanesan Organizasaun ba Ai-han no Agrikultura (FAO-sigla inglés), Fundu Nasaun Unida ba Labarik (UNICEF-sigla inglés), Organizasaun Saúde Mundiál (WHO-sigla inglés), no Programa Ai-han Mundiál (WFP-sigla inglés) servisu hamutuk ho Governu TL no komunidade vulneravél hodi suporta mapamentu ba objetivu dezenvolvimentu sustetavél liuhosi haforsa sistema ai-han, seguransa ai-han no nutrisaun ba ema hothotu, ho vizaun ida atu atinje dezenvolvimentu sustentavél hodi eradika (halakon) hamlaha iha 2030.

Tema ba loron mundiál alimentár tinan ne’e mak “Ita nia nasaun mak ita nia futuru, posivél hodi atinje zero hamlaha iha 2030”.

Zero hamlaha signifika servisu hamutuk hodi garante ema hothotu iha ne’ebé de’it asesu ba ai-han lorloron, asesu ba ai-han ne’ebé seguru, saudavél no nutriente ne’ebé sira presiza ba moris saudavél no produtivu.

Tanba ne’e, Loron Mundiál Alimentár fó oportunidade atu hanoin kona-ba buat ne’ebé importante ba ita hotu ho ai-han ne’ebé ita konsumu.

Iha Timor-Leste maske iha progresu di’ak ne’ebé hala’o ona depois independénsia, maibé sei iha preokupasaun tanba ema barak mak seidauk bele hetan ai-han adekuadu; má nutrisaun no hamlaha kontinua sai preokupasaun.

Iha estimasaun katak kustu má nutrisaun ba pezu ekonomia TL hamutuk milliaun $41 iha kada tinan, tanba lakon produtividade, dezempeñu servisu ne’ebé ladun di’ak no mós aumenta kustu ba saúde hodi reprezenta porsentu ida to’o rua.

Iha mundu, númeru ema hamlaha aumenta. Bazea ba relatóriu Estadu, seguransa ai-han no nutrisaun iha mundu 2018, iha 2017 totál ema ne’ebé hamlaha hamutuk milliaun 821, maizumenus ema ida hosi nain sia hosi populasaun globál.

Adisionalmente, labarik milliaun 200 kontinua sofre má nutrisaun raes badak no krekas, porsentu 60 feto iha mundu hamlaha. Iha tinan rua ba kotuk tendénsia redusaun hamlaha reversa hosi pozitivu ba fali negativu.

Reversaun progresu ne’e fó alarme ne’ebé klaru katak iha buat barak mak sei presiza halo, urjentemente se karik hakarak atinje objetivu dezenvolvimentu sustentavél hodi eradika hamlaha ka zero hamlaha iha 2030.

Hamlaha no má nutrisaun kontinua sai nu’udar bareira ba dezenvolvimentu sustentavél, individu ne’ebé menus produtividade dalabarak fasil hetan moras, fó impaktu la-di’ak ba rendimentu no sira nia abilidade hodi hadi’a moris.

Labarik feto, no foin sa’e dalabarak sai nu’udar grupu vulneravél ka afetadu. Objetiivu Dezenvolvimentu Sustentavél (ODS) barak hanesan kualidade edukasaun no saúde di’ak ba ema hothotu, sei bele atinje bainhira la elimina hamlaha.

Enkuantu, Governu prioritiza hodi garante seguransa ai-han no kombate má nutrisaun, nune’e iha buat balun ne’ebé susesu liuhosi polítika no estrutura estratéjika forsa no mekanizmu hanesan multisetorál hanesan Planu Asaun Zero Hamlaha hodi eradika hamlaha no má nutrisaun iha TL, nomós Konsellu Nasionál Seguransa no Soberania Alimentár no nutrisaun iha TL.

Atu atinje mundu laiha hamlaha ho tipu má nutrisaun hothotu iha 2030, tenke aselera no aumenta asaun hirak ne’ebé hodi haforsa rezilénsia no adapta kapasidade sistema ai-han no moris ema nian hodi hatan ba mudansa klimátika, ida ne’ebé TL hasoru hanesan El Nino ka bailoron naruk no La-Nina udan la para.

Mudansa klimátika oioin fó impaktu negativu ba dimensaun ai-han hothotu hanesan disponibilidade ai-han, asesu ba ai-han, utilizasaun no estabilidade nune’e mós halo kauza sira seluk hanesan má nutrisaun relasiona ho kuida fó han labarik, servisu saúde no saúde ambientál.

Risku inseguransa alimentár no má nutrisaun dadaun ne’e sai boot, tanba subsisténsia, liuliu ba ema ki’ak sira afetadu liu kontinua sai sai vulneravél ba mudansa klimátika.

Jornalista: Zezito Silva

Editora: Rita Almeida

HAKEREK NO HATÁN

Please enter your comment!
Please enter your name here